ក្រសួងកសិកម្ម រុក្ខាប្រមាញ់ និងនេសាទ បច្ចុប្បន្ននេះ បានកំពុងសិក្សានិងស្វែងយល់បន្ថែម ក្នុងការបង្កើតពូជកៅស៊ូដើម្បីជំរុញដល់ទិន្នផលខ្ពស់ ធន់នឹងជំងឺ ក៏ដូចជាការរក្សានូវគុណភាពដី និងកាត់បន្ថយនូវការចំណាយផ្សេងៗក្នុងផលិតកម្ម ដោយវិធីសាស្ត្រ មិនភ្ជួរ (No till planter)ដើម្បីបង្កើនប្រាក់ចំណេញដល់ប្រជាកសិករ។

ក្នុងដំណើរទស្សនកិច្ចនៅវិទ្យាស្ថានស្រាវជ្រាវកៅស៊ូកម្ពុជា ស្ថិតនៅខេត្តត្បូងឃ្មុំ កាលពីរសៀលថ្ងៃទី២៤ មករា ឆ្នាំ២០២៣កន្លងទៅនេះ ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានមានប្រសាសន៍ប្រាប់បណ្តាញអ្នកសារព័ត៌មានថា ក្រសួងកំពុងពិសោធន៍នូវពូជកៅស៊ូថ្មីមួយទៀត ដែលនឹងផ្ដល់ទិន្នផលបានច្រើនជាងទិន្នផលនៃពូជកៅស៊ូធម្មតា លើស៥០% ជាពិសេសធន់នឹងជំងឺ។

ឯកឧត្តម បានឲ្យដឹងថា ការងារកៅស៊ូឃើញថាល្អ ហើយកម្ពុជា ជាប្រទេសផលិតកៅស៊ូច្រើន ទាំងកៅស៊ូគ្រួសារ និងកៅស៊ូឧស្សាហកម្ម។ ឯកឧត្តមគិតថា លទ្ធផលនៃការសិក្សាទាំងអស់នេះ នឹងបង្កើនផលិតផល និងបង្កើនប្រាក់ចំណេញថែមទៀតជូនដល់កសិករក្នុងស្រុកទាំងអស់។

សូមជម្រាបជូនបថា ក្នុងដំណើរទស្សនកិច្ចនេះ ឯកឧត្តមរដ្ឋមន្រ្តី បានចុះពិនិត្យមើលស្ថានីយ៍ស្រាវជ្រាវកសិកម្មអភិរក្សបុសខ្នុរ ស្ថិតនៅឃុំបុសខ្នុរ ស្រុកចំការលើ ខេត្តកំពង់ចាម នូវវិធីសាស្ត្រក្នុងការដាំដុះមួយចំនួនមិនចាំបាច់ភ្ជួររាស់ ដោយមានការកាត់បន្ថយចំណាយមួយចំនួន ជាពិសេសការថែរក្សាដី ដើម្បីឲ្យមានគុណភាពបានយូរ។

ការពិសោធន៍សម្រាប់ការដាំដុះ ដោយមិនចាំបាច់ភ្ជួររាស់នេះដែរ ក៏កំពុងតែធ្វើ និងកំពុងតែពង្រីកផងដែរ ហើយក្រសួងកសិកម្ម នឹងតាមដានបន្ដទៀត នៅពេលដែលទទួលបានលទ្ធផលល្អក្នុងឆ្នាំ២០២៥ខាងមុខ ដោយឯកឧត្តមជឿថា ក្រសួងមិនមើលតែផលិតភាព ពាក់ព័ន្ធជាមួយនឹងបច្ចេកទេសនោះទេ គឺត្រូវមើលប្រសិទ្ធភាព ផ្នែកសេដ្ឋកិច្ចថែមទៀត តើធ្វើទៅពិតជាចំណេញមែន ឬមួយក៏យ៉ាងណា។

ក្នុងឱកាសស្តាប់បទបង្ហាញការងារនានាពាក់ព័ន្ធការដាំដុះកសិកម្មនេះ ឯកឧត្តមរដ្ឋមន្ត្រី ឌិត ទីណា បានផ្តល់នូវមតិផ្តាំផ្ញើដល់មជ្ឈមណ្ឌល ឲ្យធ្វើតាមបែបវិទ្យាសាស្ត្រពិតប្រាកដ និងមានមូលដ្ឋាន ឯកសារយោងច្បាស់លាស់ ហើយត្រូវហ៊ានប្រឈមមុខ ដើម្បីអភិវឌ្ឍខ្លួនបន្ថែមទៀត។

លើសពីនេះទៀត មជ្ឈមណ្ឌលត្រូវធ្វើការដកពិសោធន៍ផ្ទាល់រាល់វិធីសាស្ត្រឱ្យមានភាពជឿជាក់ ដោយប្រើប្រាស់ប្រភេទដីផ្សេងៗ ឬដីហិរឱ្យមានប្រសិទ្ធភាព និងអាចគៀងគរគម្រោងដើម្បីជួយគាំទ្រការដាំដុះ៕