អាមេរិក៖ នគរបាលនិយាយថា មនុស្ស ៣នាក់បានស្លាប់ក្នុងការបាញ់បោះដោយសេរីនៅហាងលក់ទំនិញមួយនៅកណ្ដាលរដ្ឋ Washington កាលពីព្រឹកថ្ងៃអង្គារ ហើយជនសង្ស័យបានស្លាប់ ក្រោយការតាមប្រមាញ់រយៈពេលមួយម៉ោង។
អធិការនគរបាលប្រចាំតំបន់លោក Matt Murray បានប្រាប់ក្រុមអ្នកសារព័ត៌មានថា មានទូរស័ព្ទបន្ទាន់មកកាន់នគរបាលពីហាងលក់ទំនិញ Circle K ក្នុងទីក្រុង Yakima រដ្ឋ Washington សហរដ្ឋអាមេរិកនៅម៉ោងប្រហែល 3.30នាទីព្រឹក នៅពេលមនុស្ស ៣នាក់ដែលពុំត្រូវបានកំណត់អត្តសញ្ញាណត្រូវបានប្រទះឃើញស្លាប់។ ជនរងគ្រោះ ២នាក់ត្រូវបានបាញ់នៅក្នុងហាង តាមអ្វីដែលក្រុមអាជ្ញាធរនិយាយថា ទំនងជាកើតចេញពីអំពើហិង្សាមានចេតនាបាញ់បោះដោយសេរី ហើយជនរងគ្រោះទី៣ ត្រូវបានរកឃើញនៅខាងក្រៅហាង។
នគរបាលបាលនិយាយថា ក្រោយបើកការបាញ់ប្រហារនៅហាងលក់ទំនិញ ជនសង្ស័យដែលត្រូវបានកំណត់អត្តសញ្ញាណឈ្មោះ Jarid Haddock វ័យ ២១ឆ្នាំបានរត់ឆ្លងផ្លូវគេចខ្លួន និងបានបាញ់រះទៅលើរថយន្តមួយគ្រឿងដោយបង្ខំឲ្យអ្នកបើករថយន្តទៅអង្គុយកៅអីអ្នកដំណើរ។ ជនសង្ស័យបានលួចរថយន្ត និងរត់គេចខ្លួនបាត់។ អំឡុងការតាមប្រមាញ់រយៈពេលមួយម៉ោង នគរបាលបានលឺស្នូរគ្រាប់កាំភ្លើងចេញពីកន្លែងលាក់ខ្លួនរបស់ជនសង្ស័យ ក្រោយមកបានប្រទះឃើញជនសង្ស័យ Haddock ដេកស្លាប់ដោយសាររបួស។
គួរឲ្យដឹងថា ការបាញ់ប្រហារនៅក្នុងទីក្រុង Yakima គឺជាការបាញ់បោះដោយសេរីចុងក្រោយនៃអំពើហិង្សាដោយអាវុធ ដែលបានធ្វើឲ្យកក្រើកសហរដ្ឋអាមេរិក។ ហេតុការណ៍នេះបានកើតឡើង ក្រោយការបាញ់ប្រហារចំនួន ៣លើកនៅរដ្ឋ California ចាប់តាំងពីពិធីបុណ្យចូលឆ្នាំចិនដែលបានសម្លាប់មនុស្សជាង ២០នាក់៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
