​ចិន៖ ប្រព័ន្ធ​ផ្សព្វផ្សាយ​រដ្ឋ​ចិន​បាន​រាយការណ៍​កាលពី​ថ្ងៃ​អង្គារ ទី​២៤​មករា​ថា ទីក្រុង Mohe ភាគ​ខាងជើង​របស់​ប្រទេស​ចិន បាន​រង​ការ​ប៉ះពាល់​ពី​សីតុណ្ហភាព​ត្រជាក់​បំផុត​មិន​ធ្លាប់​មាន​។

​យោង​តាម​ប្រព័ន្ធ​ផ្សព្វផ្សាយ​រដ្ឋ CCTV ទីក្រុង​ Mohe ដែល​ព្រំដែន​ជាប់​ជាមួយ​រុស្ស៊ី​នៅ​ភាគ​ខាងជើង បាន​កត់ត្រា​សីតុណ្ហភាព​ត្រជាក់​ប្រហែល​ -53​អង្សា​សេ ជា​ការចុះ​ត្រជាក់​មិន​ធ្លាប់មាន​ដែល​កាលពី​ឆ្នាំ​១៩៦៩ សីតុណ្ហភាព​ចុះ​ត្រជាក់​ដល់​ -52.3​អង្សា​សេ​។ ការ​កត់ត្រា​ពី​សីតុណ្ហភាព​ត្រជាក់​បំផុត​នេះ ត្រូវ​បាន​ធ្វើឡើង​នៅ​ស្ថានីយ​ព្យាករណ៍​អាកាសធាតុ​ក្នុង​ទីប្រជុំជន Amur នៃ​ទីក្រុង Mohe ក្នុង​ខេត្ត​ Heilongjiang ដែល​ក្លាយ​ជា​សីតុណ្ហភាព​ត្រជាក់​បំផុត​ដែល​ធ្លាប់​បាន​កត់ត្រា​នៅ​ក្នុង​ខេត្ត​នេះ និង​ការ​ចុះ​ទាប​បំផុត​ដែល​ត្រូវបាន​តាមដាន​ដោយ​ប្រព័ន្ធ​ឧតុនិយម​ចិន​។

​ទីក្រុង Mohe តែង​ត្រូវ​បាន​សំដៅ​ដល់​ទី​ក្រុង​តំបន់​អាក​ទិ​ករ​បស់​ចិន និង​មួយ​ក្នុងចំណោម​តំបន់​មួយ​ចំនួន​នៅ​ក្នុង​ប្រទេស​នេះ ​ដែល​ងាយ​រង​ផលប៉ះពាល់​ដោយ​បម្រែបម្រួល​អាកាសធាតុ។ រដូវរងា​ក្នុង​ទីក្រុង​នេះ​ចាប់ផ្ដើម​ពី​ពាក់កណ្ដាល​ខែ​តុលា និង​បន្ត​រហូតដល់​ចុងខែ​មេសា ហើយ​សីតុណ្ហភាព​ជា​មធ្យម​អាច​ស្ថិត​នៅ​ក្រោម​សូន្យ​មាន​រយៈពេល​ ៨​ខែ​ជា​រៀង​រាល់​ឆ្នាំ​៕

អត្ថបទ៖ សុខមាន