ភ្នំពេញ៖ ទីភ្នាក់ងារជាតិមុខរបរ និងការងារ (NEA) នៃក្រសួងការងារ និងបណ្តុះបណ្តាលវិជ្ជាជីវៈ នឹងសហការជាមួយ សសយក វិស័យការងារ និងបណ្តុះបណ្តាលវិជ្ជាជីវៈ រៀបចំវេទិកាការងារប្រចាំខែដោយមានក្រុមហ៊ុនធំៗចំនួន៩ ចូលរួមដោយនាំយកឱកាសការងារថ្មីបន្ថែមទៀតចំនួន ៨៩០កន្លែង ជូនយុវជន សិស្ស/នស្សិត និងអ្នកស្វែងរកការងារធ្វើ។

វេទិកាការងារនេះ នឹងត្រូវរៀបចំឡើងចាប់ពីម៉ោង៨ព្រឹក ដល់ម៉ោង៥ល្ងាច នៅថ្ងៃព្រហស្បតិ៍ ទី២៦ ខែមករា ដែលមានទីតាំងស្ថិតនៅក្នុងបរិវេណក្រសួងការងារ និងបណ្តុះបណ្តាលវិជ្ជាជីវៈ។

មន្ត្រីទីភ្នាក់ងារជាតិមុខរបរ និងការងារ និងមន្ត្រីជ្រើសរើសបុគ្គលិកជាន់ខ្ពស់ នៃក្រុមហ៊ុននានា បាននិយាយថា គ្រឹះស្ថាន និងក្រុមហ៊ុននានាដែលបានសហការជាមួយ NEA ជាច្រើនលើកមកនេះ គឺមានភាពងាយស្រួលយ៉ាងខ្លាំង ក្នុងការជ្រើសរើសបុគ្គលិក និងបានទទួលបុគ្គលិក ក៏ដូចជា​សិស្សនិស្សិត​ជាច្រើន មកប្រើការនៅក្នុងអង្គភាពរបស់ខ្លួន តាមរយៈពិព័រណ៍ការងារនេះ។ ប៉ុន្តែដោយសារការវិវឌ្ឍ និងភាពរីកចម្រើនរបស់ក្រុមហ៊ុន ទើបពួកក្រុមពួកគាត់មកចូលរួមជាថ្មីទៀត ព្រោះពួកគាត់បានចាត់ទុកថា NEAជាស្ថានប័នរដ្ឋមួយដ៏សំខាន់សម្រាប់ជួយដល់និយោជក និងនិយោជិតជួបគ្នា ហើយក៏ជាកន្លែងសម្រាប់អ្នកមានបំណងផ្លាស់ប្តូរការងារ អាចផ្លាស់ប្តូរការងារ ឬចង់ស្វែងរកការងារបានយ៉ាងងាយ។

ជាក់ស្តែងនៅក្នុងវេទិកាការងារនៅថ្ងៃទី២៦ស្អែកនេះ ក្រុមហ៊ុននានាខាងលើ នឹងនាំយកឱកាសការ​ងារ​ជិត​ប្រមាណជិត ១,០០០កន្លែង សម្រាប់អ្នកដែលចង់ស្វែងរការងារធ្វើនៅ​តាមបណ្តាសាខា​របស់ក្រុមហ៊ុន ហើយក្រុមហ៊ុនដែលចូលរួម សង្ឃឹមយ៉ាងមុតមាំថា ការចូលរួមសហការជាមួយ NEA របស់ពួកគេ នឹងរួមចំណែកដ៏សំខាន់ក្នុងការជ្រើសរើសបុគ្គលិក ប្រកបដោយគុណភាព និងទាន់តម្រូវការ។

មន្ត្រីទីភ្នាក់ងារជាតិមុខរបរ និងការងារ បញ្ជាក់ដែរថា វេទិកាការងារនេះ នឹងត្រូវរៀបចំដោយអនុវត្ត​យ៉ាង​ម៉ត់ចត់ នូវវិធានការណ៍សុខាភិបាលស្របតាមការណែនាំ​របស់ក្រសួងសុខាភិបាល គឺ ៣ការពារ ៣កុំ ដើម្បីទប់ស្កាត់ការឆ្លងរីករាលដាលនៃជំងឺ កូវីដ-១៩ ដើម្បីអាចធានាបាននូវសុវត្ថិភាព និងទំនុកចិត្តក្នុងការជ្រើស រើសកម្លាំងពលកម្ម និងទទួលបានឱកាសការងារសម្រាប់ភាគី និយោជក និងអ្នកស្វែងរកការងារ។

ដើម្បីទទួលព័ត៌មានបន្ថែម សូមទាក់ទងមជ្ឈមណ្ឌលការងារ រាជធានីភ្នំពេញនៃ ទីភ្នាក់ងារជាតិមុខរបរ និងការងារ តាមរយៈលេខទូរស័ព្ទ ០១៦ ៧៨៦ ៦៥៥ ឬគេហទំព័រ www.nea.gov.kh និងទំព័រ facebook neakhmer (អិនអ៊ីអេ ខ្មែរ)៕