​កូរ៉េខាងត្បូង៖ ព្រិល​ធ្លាក់​ក្រាស់​ៗ និង​ខ្យល់​ខ្លាំង​បាន​ប៉ះពាល់​ដល់​តំបន់​ភាគ​ខាង​ត្បូង​របស់​ប្រទេស​កូរ៉េខាងត្បូង រួម​ទាំង​ទីក្រុង​ក្វាង​ជូ (Gwangju) កាលពី​ថ្ងៃ​អង្គារ​ ទី​២៤​មករា រំខាន​ដល់​ការ​ធ្វើដំណើរ​នៅ​ថ្ងៃ​ចុងក្រោយ​នៃ​ថ្ងៃ​ឈប់​សម្រាក​បុណ្យចូលឆ្នាំ​ចិន។

​យោង​តាម​ទីភ្នាក់ងារសារព័ត៌មាន Yonhap ក្រុម​អាជ្ញាធរ​អាកាសធាតុ​បានចេញ​ការប្រកាសអាសន្ន​ពី​រលក​ត្រជាក់​ភាគច្រើន​នៅ​ក្នុង​ប្រទេស​នេះ ដោយ​នៅ​ពេលព្រឹក​សីតុណ្ហភាព​បាន​ធ្លាក់​ចុះ​ដល់ -16.4អង្សា​សេ​នៅ​ក្នុង​ទីក្រុង​សេ​អ៊ូ​ល និង​រហូតដល់ -25.5អង្សា​សេ​នៅ​ក្នុង​ស្រុក​ឆេ​អូ​វ៉ុ​ន (Cheorwon) ភាគ​ខាងជើង​។ អ្នកនាំពាក្យ​អាកាសយានដ្ឋាន​មួយ​បាន​ប្រាប់​សារព័ត៌មាន Reuters ថា ជើង​ហោះ​ហើរ​ក្នុងស្រុក​ទាំងអស់ ​៤៦៦​ជើង និង​ជើង​ហោះហើរ​អន្តរជាតិ​ចំនួន​ ១០​ជើង​ទៀត​ដែល​គ្រោង​ហោះ​ហើរ​ទៅ​ និង​មកពី​អាកាសយានដ្ឋាន​អន្តរជាតិ​ជេ​ជូ (Jeju) ត្រូវ​បាន​លុបចោល។

ចំណែក​ក្រុមហ៊ុន​អាកាសចរណ៍ Korean Air Lines បាន​បញ្ជាក់​ថា​ ខ្លួន​បាន​លុបចោល​ជើង​ហោះហើរ ​៨៨ ​នៃ​ជើង​ហោះ​ហើរ​ប្រចាំថ្ងៃ​របស់​ខ្លួន​ទាំង​ក្នុង​ និង​ក្រៅ​កោះ​មួយ​នេះ​កាលពី​ថ្ងៃ​អង្គារ ​គឺជា​ថ្ងៃ​ចុងក្រោយ​នៃ​ការ​ឈប់​សម្រាក​ពិធីបុណ្យ​ចូលឆ្នាំ​ចិន ជា​ពេលវេលា​មួយ​ក្នុងចំណោម​ថ្ងៃ​ឈប់សម្រាក​ធំ​បំផុត​ចំនួន ​២ របស់​កូរ៉េខាងត្បូង​៕

អត្ថបទ៖ សុខមាន