អាមេរិក៖ បន្ទាប់ពីការបាញ់ប្រហារជាបន្តបន្ទាប់ដ៏ធំបណ្តាលឲ្យមនុស្សជាង ២០នាក់ស្លាប់នៅរដ្ឋកាលីហ្វ័រញ៉ា សហរដ្ឋអាមេរិក ប្រធានាធិបតីលោក Joe Biden បានអំពាវនាវដល់សភាកាលពីថ្ងៃអង្គារ ឱ្យបញ្ជូនច្បាប់ដាក់បម្រាមអាវុធវាយប្រហារមកកាន់តុរបស់លោក ឱ្យបានឆាប់តាមដែលអាចធ្វើទៅបាន។
ជំនួបជាមួយមេដឹកនាំសភាគណបក្សប្រជាធិបតេយ្យលោក Biden បាននិយាយថា សមាជិកព្រឹទ្ធសភារដ្ឋកាលីហ្វ័រញ៉ាលោក Dianne Feinstein បានបង្ហាញឡើងវិញនូវច្បាប់បម្រាមអាវុធ។ នៅក្នុងការបាញ់ប្រហារ ៣លើកផ្សេងគ្នាក្នុងប៉ុន្មានថ្ងៃថ្មីៗនេះបណ្តាលឲ្យមនុស្ស ២១នាក់ស្លាប់នៅសហរដ្ឋអាមេរិក។ អាជ្ញាធរនិយាយថា ពួកគេនៅតែព្យាយាមកំណត់ពីមូលហេតុនៃការបាញ់ប្រហារទាំង ៣លើកនេះ។ ជនសង្ស័យក្នុងការវាយប្រហារ ២លើកមុនគឺជាបុរសដែលមានអាយុចូលនិវត្តន៍ ដែលចាស់ជាងខ្មាន់កាំភ្លើងធម្មតាក្នុងការបាញ់ប្រហារដ៏ឃោរឃៅ នៅក្នុងសហរដ្ឋអាមេរិក។ រដ្ឋកាលីហ្វ័រញ៉ាមានច្បាប់ហាមប្រាមកាំភ្លើងតឹងរ៉ឹងបំផុតនៅសហរដ្ឋអាមេរិក ជាប្រទេសដែលមានអត្រាមានកាំភ្លើងឯកជនខ្ពស់បំផុតក្នុងពិភពលោក។ រដ្ឋបានហាមប្រាមកាំភ្លើងជាច្រើនប្រភេទដែលស្របច្បាប់នៅក្នុងរដ្ឋផ្សេងទៀត ហើយការទទួលបានអាជ្ញាប័ណ្ណប្រើប្រាស់កាំភ្លើងនៅរដ្ឋកាលីហ្វ័រញ៉ាមានការលំបាក។
ទោះជាយ៉ាងណា អ្នករស់នៅរដ្ឋកាលីហ្វ័រញ៉ាដែលមានចេតនាបំពានច្បាប់ អាចមានអាវុធហាមឃាត់ដោយខុសច្បាប់ពីផ្នែកខ្លះរបស់ប្រទេសដែលកាំភ្លើងត្រូវបានលក់ដោយសេរី។ កាំភ្លើងខ្លីពាក់កណ្តាលស្វ័យប្រវត្តិ ជាកាំភ្លើងដែលកាន់បានយ៉ាងទូលំទូលាយបំផុតនៅក្នុងប្រទេស ហើយប្រភេទខ្លះស្របច្បាប់នៅរដ្ឋកាលីហ្វ័រញ៉ា។ ប៉ុន្តែរដ្ឋហាមឃាត់នូវអ្វីដែលខ្លួនកំណត់ថា ជាអាវុធវាយប្រហារត្រូវបានកំណត់ដោយលក្ខណៈពិសេសរបស់កាំភ្លើង និងរួមបញ្ចូលទាំងកាំភ្លើងពាក់កណ្តាលស្វ័យប្រវត្តិ MAC-10។ ប្រជាជនរដ្ឋកាលីហ្វ័រញ៉ាអាចបន្តកាន់កាប់អាវុធស្របច្បាប់ និងបានចុះបញ្ជីមុនទសវត្សរ៍ឆ្នាំ១៩៩០ ឬដើមទសវត្សរ៍ឆ្នាំ២០០០ អាស្រ័យលើប្រភេទអាវុធ៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
