ពោធិ៍សាត់៖ ទំនប់វារីអគ្គិសនីស្ទឹងពោធិ៍សាត់១ ដែលមានទីតាំងស្ថិតក្នុងឃុំប្រម៉ោយ ស្រុកវាលវែង ខេត្តពោធិ៍សាត់ មានអនុភាព​ចំនួន៨០មេហ្កាវ៉ាត់ ហើយអាចបង្កើតអគ្គិសនីច្រើនជាងគេនៅកម្ពុជា នារដូវប្រាំង និងផ្ដល់នូវអត្ថប្រយោជន៍ជាច្រើនទៀត ដល់ប្រជាពលរដ្ឋនៅក្នុងតំបន់នោះ ។

លោក ហុង ស៊ូយុង ប្រធានគម្រោងវារីអគ្គិសនីពោធិ៍សាត់១ បានឲ្យដឹដងថា គម្រោងនេះអនុវត្តដោយក្រុមហ៊ុន SPHP Cambodia Co.,Ltd និងក្រុមហ៊ុនជប៉ុន ហើយសាងសង់ដោយក្រុមហ៊ុនចិន លើផ្ទៃដីជាង ១ម៉ឺនហិកតា ដែលទំនប់វារីអគ្គិសនីនេះ បានចូលរួមអភិវឌ្ឍន៍​វិស័យ​ថាមពលនៅកម្ពុជា ដើម្បីឲ្យពលរដ្ឋអាចមានភ្លើងអគ្គិសនី ប្រើប្រាស់កាន់តែគ្រប់គ្រាន់ ចុះពីផ្លូវជាតិលេខ៥៥ ប្រមាណ១០គីឡូម៉ែត្រ ។

លោកបានបន្តថា ទំនប់វារីអគ្គិសនីនេះ បានប្រើប្រាស់ថវិកាសាងសង់ចំនួនជាង ២៥០លានដុល្លារ គ្រោងបញ្ចប់នៅចុងឆ្នាំ២០២៦ ប៉ុន្តែនឹងពន្លឿនសាងសង់ឲ្យចប់នៅត្រឹមខែ៥ ឆ្នាំ២០២៦ ហើយទំនប់នេះ ក្រៅពីបង្កើតអគ្គិសនីសម្រាប់ប្រើប្រាស់ ដោយទឹក​ទប់​នៅ​ក្នុងវារីអគ្គិសនី អាចទម្លាក់ឲ្យពលរដ្ឋប្រើប្រាស់សម្រាប់វិស័យកសិកម្ម និងតម្រូវការផ្សេងៗ ជួយបញ្ចៀសនូវទឹកជំនន់ធំៗក្នុងខេត្ត ព្រមទាំងនឹងក្លាយជាតំបន់ទេសចរណ៍ថ្មីមួយបន្ថែមទៀត នៅក្នុងខេត្តពោធិ៍សាត់ ។

លោក ហុង ស៊ូយុង បានបន្ថែមថា សម្រាប់ពលរដ្ឋមានការប៉ះពាល់ដោយសារគម្រោងនេះ ប្រមាណជាង ៣០០គ្រួសារ ក៏បាន​ដោះ​ស្រាយរួចរាល់ ដោយអ្នកខ្លះទទួលបានប្រាក់ ខ្លះទទួលបានផ្ទះ និងដីធ្វើកសិកម្មចំនួន ៥ហិកតា ។

គួរបញ្ជាក់ថា ក្រៅពីគម្រោងទំនប់វារីអគ្គិសនីស្ទឹងពោធិ៍សាត់១ ខេត្តពោធិ៍សាត់ ក៏មានទំនប់វារីអគ្គិសនីមួយទៀត គឺទំនប់វារីអគ្គិសនី​ស្ទឹងអាតៃ ដាក់ឲ្យប្រើប្រាស់កាលពីឆ្នាំ២០១៤ មានទីតាំងស្ថិតក្នុងភូមិឆាយលូក ឃុំអូរសោម ស្រុកវាលវែង មានអានុភាព១២០មេហ្កាវ៉ាត់ ដោយចំណាយថវិកាវិនិយោគសរុប ២៥៥,៣០លានដុល្លារអាមេរិក ។ ក្រៅពីគម្រោងវារីអគ្គិសនីធំៗទាំង២នេះ ខេត្តពោធិ៍សាត់ មានស្ថានីយ៍ផលិតថាមពលអគ្គិសនី ដើរដោយ ថាមពលពន្លឺព្រះអាទិត្យ ធំជាងគេនៅកម្ពុជា មានអានុភាពសរុប៩០មេហ្គាវ៉ាត ៕ ដោយ ៖ សុខរិទ្ធិ