ភ្នំពេញ៖ គម្រោងអភិរក្ស និងជួសជុសជ្រុងខាងជើងប្រាសាទភ្នំបាខែង គិតត្រឹមពេលបច្ចុប្បន្ននេះ គឺ​សម្រេចបាន ៥០ភាគរយហើយ។ ​នេះជាការបញ្ជាក់របស់ ​ក្រសួងវប្បធម៌ និងវិចិត្រសិល្បៈក្នុងទំព័រហ្វេសប៊ុករបស់ខ្លួន។

ក្រសួងវប្បធម៌ និងវិចិត្រសិល្បៈ​ បានបញ្ជាក់ក្នុងទំព័រហ្វេសប៊ុករបស់ខ្លូននៅថ្ងៃនេះថា គម្រោង​អភិរក្សន៍​ និងជួសជុសជ្រុងខាងជើងប្រាសាទភ្នំបាខែង ដែលអនុវត្តគម្រោងដោយ​មូលនិធិប្រាសាទ​ពិភពលោក (World Monuments Fund) គឺសម្រេចបានប្រមាណ ៥០ភាគរយហើយគិតត្រឹម​ពេលបច្ចុប្បន្ន។

លោកស្រី Ginevra Boatto ​អ្នកទទួលខុសត្រូវនៃគម្រោងអភិរក្សរបស់ WMF បានឱ្យដឹងថា គម្រោងជួសជុល​នៅជ្រុងខាងជើងប្រាសាទភ្នំបាខែង ជំហានទី៣នេះ គឺបានអនុវត្តតាំងពីឆ្នាំ ២០១៩មកម្លេះ។ លោកស្រីបន្តថា ការងារនេះអាចចំណាយពេលខរហូតដល់ប្រមាណ ៦ឆ្នាំទៀត ដើម្បីរួចរាល់ជាស្ថាពរ។

មិនខុសពីប្រាសាទដទៃទៀតដែរ ប្រាសាទភ្នំបាខែងរងការខូចខាតដោយសារកត្តាពេលវេលា អាកាសធាតុ ​ដែលធ្វើឱ្យរចនាសម្ព័ន្ធប្រាសាទនេះខូចខាត និងទ្រេត​ ហើយកន្លែងខ្លះរលំផងដែរ ដូចជា​នៅតាមជ្រុង នីមួយៗ ដោយសារមានទឹកហូរច្រោះ។ ការជួសជុល គេត្រូវកាយថ្មនៅ​បាតគ្រឹះចេញ ​ដោយបុកបង្ហាប់ គ្រឹះថ្មី និងធានាថា ទឹកមិនហូរច្រោះតទៅទៀត។ ក្រៅពីនោះ ក៏មានការជួសជុលតួប៉ម​ នៅតាមជ្រុងនីមួយៗផងដែរ ដែលបានបាក់ និងដួលរលំ។ល។

អ្នកទទួលខុសត្រូវនៃគម្រោងអភិរក្សរបស់ WMF ​បានបញ្ជាក់ថា គម្រោងអភិរក្ស និងជួសជុល​ប្រាសាទ ភ្នំបាខែង ដែលជាគម្រោងកិច្ចសហប្រតិបត្តិការជាមួយអាជ្ញាធរជាតិអប្សរា ចាប់ផ្តើមពីឆ្នាំ ២០០៩មក។ ហើយនៅជំហានបន្ទាប់ WMF នឹងគិតគូរជួយអភិរក្សប្រាសាទ​ដទៃទៀតក្នុង​តំបន់រមណីយដ្ឋានអង្គរ។ ​បន្ទាប់ពីមានវត្តមាននៅខេត្តសៀមរាបជាង ​៣០ឆ្នាំមក WMF បានជួយ​កិច្ចអភិរក្សនៅប្រាសាទមួយចំនួន ដូចជា ប្រាសាទព្រះខ័ន​ ប្រាសាទតាសោម ប្រាសាទអង្គរវត្ត និងប្រាសាទភ្នំបាខែងជាដើម៕អត្ថបទ៖ គឹមហុក