អន្ដរជាតិ៖ នៅថ្ងៃពុធនេះ ក្រុមឆ្មាំសមុទ្រកូរ៉េខាងត្បូង និងជប៉ុន កំពុងបន្តប្រតិបត្តិការរុករកនាវិកបាត់ខ្លួន ៩នាក់ ក្រោយ​សង្រ្គោះបាន​មនុស្ស ១៣នាក់ ពីនាវាដឹកទំនិញដែលបានលិច​នៅតំបន់ភាគនិរតី​ប្រទេសជប៉ុន។​ យន្តហោះ និងនាវា បានរុករកតាមតំបន់លាតសន្ធឹងចម្ងាយ ១១០គ.ម នៅភាគខាងលិចកោះ Danjo។ រូបភាពហ្វិក​ទទួលបានពីក្រុមឆ្មាំសមុទ្រកូរ៉េខាងត្បូង ឃើញ​នាវារបស់ពួកគេចូលរួមប្រតិបត្តិការជួយសង្រ្គោះនៅក្នុងសមុទ្រ។យោងតាមការអះអាងរបស់ក្រុមឆ្មាំសមុទ្រជប៉ុន បានឲ្យដឹងថា កាលពីយប់ថ្ងៃអង្គារ ពួកគេទទួលបាន​ការហៅ​ទូរស័ព្ទ​សុំជំនួយសង្រ្គោះបន្ទាន់​ពីនាវាដឹកទំនិញ Jintian ចំណុះ ៦.៦៥១តោន ដែលបានចុះ​បញ្ជី​នៅទីក្រុងហុងកុង៕