អន្ដរជាតិ៖ ភ្ញៀវទេសចររាប់ម៉ឺននាក់ បានទៅកម្សាន្តលេងទីក្រុងម៉ាកាវ អំឡុងពិធីបុណ្យឆ្នាំចិន ដែលជាចំនួនភ្ញៀវច្រើនបំផុត ចាប់តាំងពីឆ្នាំ ២០២០ ពេលដែលទីក្រុងប៉េកាំង ​ដកចេញវិធានការរឹតត្បិតជំងឺ COVID-19។

រដ្ឋបាលទីក្រុងកាស៊ីណូមួយនេះ បាននិយាយនៅក្នុងសេចក្តីថ្លែងការណ៍កាលពីល្ងាចថ្ងៃអង្គារថា ទីក្រុងម៉ាកាវ បានស្វាគមន៍​ភ្ញៀវទេសចរជាង ៧១.០០០នាក់ កាលពីថ្ងៃចន្ទ ដែល​ជាចំនួនភ្ញៀវច្រើនបំផុតក្នុងរយៈពេល ១ថ្ងៃ ចាប់តាំងពីការរីករាលដាល​ឆ្លងសកលជំងឺ COVID-19 ។ លំហូរភ្ញៀវទេសចរនេះ បានកើតមាន បន្ទាប់ពីទីក្រុងប៉េកាំងបើកព្រំដែនឡើងវិញ​ជាមួយ​ប្រទេស​ផ្សេងទៀត​ នៅលើ​ពិភពលោកជាលើកដំបូង ក្នុងរយៈពេល ៣ឆ្នាំ៕