ស៊ីហ្គេម៖ ការប្រកួតកីឡាស៊ីហ្គេមនឹងរៀបចំធ្វើនៅក្នុងប្រទេសកម្ពុជាដែលគិតពីថ្ងៃទី២៥ ខែមករាតទៅគឺនៅសល់ ១០០ថ្ងៃទៀត ខណៈការទទួលបានសិទ្ធិធ្វើជាម្ចាស់ផ្ទះនេះ ត្រូវបានប្រជាពលរដ្ឋក្នុងខេត្តត្បូងឃ្មុំសម្តែងក្តីរីករាយ និងបានលើកឡើងថា វាជាមោទកភាពជាតិមួយយ៉ាងខ្លាំង ក្រោមការដឹកនាំប្រកបដោយគតិបណ្ឌិតរបស់សម្តេចតេជោ។
ដើម្បីឲ្យព្រឹត្តិការណ៍ប្រកួតកីឡានេះបានជ្រួលជ្រាបដល់ប្រជាជនទូទៅ និងបងប្អូនប្រជាពលរដ្ឋដែលចូលចិត្តលេងកីឡា កាលពីរសៀលថ្ងៃទី២៥ ខែមករា ឆ្នាំ២០២៣ ឯកឧត្តម នៅ សារី ប្រធានគណៈកម្មការរៀបចំពានរង្វាន់ឯកឧត្តម បណ្ឌិត ហ៊ុន ម៉ាណែត បានរៀបចំការប្រកួតបាល់ទាត់មិត្តភាពមួយដើម្បីបំផុសឲ្យប្រជាពលរដ្ឋ ពិសេសយុវជនបានចូលរួមយុទ្ធនាការរាប់ថយក្រោយតាមការបំផុសរបស់សម្តេចតេជោ ពិសេសដើម្បីឲ្យបងប្អូនប្រជាពលរដ្ឋបានយល់កាន់តែច្បាស់ពីសារៈសំខាន់ និងផលប្រយោជន៍ដែលប្រទេសកម្ពុជាធ្វើជាម្ចាស់ផ្ទះការប្រកួតកីឡាស៊ីហ្គេមនេះ។
ជាចំណាប់អារម្មណ៍បងប្អូនប្រជាពលរដ្ឋបានលើកឡើងប្រហាក់ប្រហែលគ្នាថា វាជាមោទកភាពជាតិ ពិសេសគឺធ្វើឲ្យពិភពលោកស្គាល់ខ្មែរកាន់តែច្បាស់ នោះគឺកម្ពុជាជាប្រទេសមានសុខសន្តិភាពយ៉ាងពិតប្រាកដ។ ការប្រកួតកីឡាស៊ីហ្គេម និងអាស៊ានប៉ារ៉ាហ្គេមដែលកម្ពុជាធ្វើជាម្ចាស់ផ្ទះនឹងចាប់ផ្តើមពីថ្ងៃទី០៥ ខែឧសភា ពោលគឺចាប់ពីថ្ងៃទី២៦ ខែមករានេះតទៅនៅសល់ ៩៩ថ្ងៃទៀត។
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
