មណ្ឌលគិរី៖ ក្រសួងកសិកម្ម រុក្ខាប្រមាញ់ និងនេសាទ នៅព្រឹកថ្ងៃទី២៦ មករា ឆ្នាំ២០២៣នេះ បានប្រកាសជាផ្លូវការ ក្នុងការដាក់ឲ្យប្រើប្រាស់ សួនបច្ចេកវិទ្យាកសិកម្ម នៃមជ្ឈមណ្ឌលឧត្តមភាព​ប្រពលវប្បកម្មកសិកម្មនិរន្តរភាព និងអាហាររូបត្ថម្ភ (ស៊ីសេន) ស្ថិតក្នុងក្រុងសែនមនោរម្យ ខេត្តមណ្ឌលគិរី។

កម្មវិធីសម្ពោធសួនបច្ចេកវិទ្យាកសិកម្មនេះ បានប្រារព្ធធ្វើឡើងក្រោមអធិបតីភាពឯកឧត្តម ឌិត ទីណ រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ និងមានការអញ្ញើញចូលរួមពី ឯកឧត្តម W.Patrick Murphy ឯកអគ្គរដ្ឋទូតសហរដ្ឋអាម៉េរិកប្រចាំកម្ពុជា, តំណាងទីភ្នាក់ងារសហរដ្ឋអាម៉េរិកសម្រាប់​ការអភិវឌ្ឍអន្តរជាតិ (USAID) ប្រចាំនៅកម្ពុជា, ភ្ញៀវកិត្តិយសជាតិ អន្តរជាតិ និងប្រជាកសិករ សរុបចំនួនប្រមាណ ១៥០នាក់។

សួនបច្ចេកវិទ្យាកសិកម្មនេះ ត្រូវបានបង្កើតឡើងក្នុងគោលបំណងជាថ្នាលសម្រាប់រៀន​សូត្ររបស់​កសិករនិងតួអង្គពាក់ព័ន្ធ, ជាទីតាំងសម្រាប់ការស្រាវជ្រាវ, ជាថ្នាលសម្រាប់កម្មវិធីហាត់ការ​កសិកម្ម​ដល់និស្សិតនិងកសិករ, ជាកម្មវិធីសហការអនុវត្តសកម្មភាពជាមួយ ដៃគូ និងជាវេទិកាភ្ជាប់​ទំនាក់ទំនងជាមួយវិស័យឯកជន។

សួនបច្ចេកវិទ្យាកសិកម្មនេះដែរ ស្ថិតក្នុងទីធ្លាមន្ទីរកសិកម្ម រុក្ខប្រមាញ់ និងនេសាទ ខេត្តមណ្ឌលគិរី ទើបតែចាប់ផ្តើមរៀបចំសកម្មភាពប៉ុន្មានខែចុងក្រោយនេះ ដែលទាមទារនូវការរៀបចំ និងកែលម្អ​បន្ថែមទៀត ដើម្បីក្លាយជាទីតាំងកាន់តែប្រសើរមួយសម្រាប់ចូលរួម និងបម្រើជាផលប្រយោជន៍​ដល់ការអភិវឌ្ឍវិស័យកសិកម្មនៅប្រទេសកម្ពុជា។

សូមបញ្ជាក់ថា សាកលវិទ្យាល័យភូមិន្ទកសិកម្ម បានចុះមកសហការជាមួយមន្ទីរកសិកម្ម រុក្ខាប្រមាញ់ និងនេសាទខេត្តមណ្ឌលគិរីនេះជាច្រើនឆ្នាំមក​ហើយ ក្នុងការស្រាវជ្រាវ​ពីសក្តានុពល​នៃដំណាំដំឡូងបារាំង និងបានជួបណ្តុះបណ្តាលប្រជាកសិករធ្វើផលិតកម្ម​ដំណាំ​ដំឡូង​បារាំង​បានដោយជោគជ័យ និងបានជួយបណ្តុះបណ្តាលលោកប្រធានមន្ទីរកសិកម្មរុក្ខាប្រមាញ់ និងនេសាទធ្វើការស្រាវជ្រាវនិក្ខេបបទលើដំណាំដំឡូងបារាំងបញ្ចប់ការសិក្សាថ្នាក់បណ្ឌិត៕