ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រី នៃកម្ពុជា បានមានប្រសាសន៍ថា កម្ពុជាស្វាគមន៍​ប្រទេសទាំងអស់ ក្នុងនោះក៏មានប្រទេសរុស្ស៊ីផងដែរ បើសិនជាចង់មករៀនជំនាញ​បោសសម្អាត​មីន​ពីមន្រ្ដីជំនាញរបស់កម្ពុជា ពីព្រោះកម្ពុជាបានធ្វើការងារនេះជាការងារមនុស្សធម៌​ជាមួយអង្គការ​សហប្រជាជាតិជាច្រើនឆ្នាំមកហើយ។

សម្ដេចតេជោ ហ៊ុន សែន មានប្រសាសន៍បញ្ជាក់បែបនេះ ក្នុងឱកាសសម្ដេចអញ្ជើញ​ជាអធិបតីភាព​ដ៏ខ្ពង់ខ្ពស់ក្នុងពិធីប្រគល់សញ្ញាបត្រ ជូននិស្សិត​ជ័យលាភីថ្នាក់បរិញ្ញាបត្ររង បរិញ្ញាបត្រ បរិញ្ញាបត្រជាន់ខ្ពស់ និងបណ្ឌិត នៃសាកលវិទ្យាល័យវេស្ទើន កាលពីព្រឹកថ្ងៃទី២៦ ខែមករា ឆ្នាំ២០២៣នេះ នៅមណ្ឌលសន្និបាតនិងពិព័រណ៍អន្តរជាតិជ្រោយចង្វារ (CCIC)។

សម្ដេចតេជោ បានមានប្រសាសន៍ថា ថ្មីៗនេះមានសារព័ត៌មានអន្តរជាតិបានលើកឡើងនូវព័ត៌មាន​មិនពិតមួយថា កម្ពុជាបានផ្ដល់ជំនួយយោធាដល់អ៊ុយក្រែន។ ករណីនេះ សម្ដេច បានបញ្ជាក់ថា កម្ពុជាមិនបានផ្ដល់ជំនួយយោធាដល់អ៊ុយក្រែនទេ ហើយកម្ពុជាក៏គ្មាន​សមត្ថភាពផ្ដល់ដល់ជំនួយ​យោធានេះដល់ប្រទេសអ៊ុយក្រែនដែរ។

សម្ដេចបានមានប្រសាសន៍បញ្ជាក់ា ចំណែកការហ្វឺកហ្វឺនជំនាញបោសសម្អាតមីន ដោះមីនដល់​សិក្ខាសកាម អ៊ុយក្រែន កាលពីថ្ងៃទី១៦ ខែមករា កន្លងទៅនេះ គឺជាការងារមនុស្សធម៌សុទ្ធសាធ។

សម្តេចតេជោ ហ៊ុន សែន បានបញ្ជាក់ ប្រទេសណាក៏ដោយដែលចង់មករៀនដោះមីន​នៅ​ប្រទេសកម្ពុជា កម្ពុជានឹងស្វាគមន៍ទទួលទាំងអស់។ សម្ដេចតេជោរម្លឹកថា បញ្ហាមីននេះកម្ពុជា​ប្រើ​ពេល ៣០ ឆ្នាំហើយដើម្បីដោះស្រាយ ប៉ុន្ដែបច្ចុប្បន្នកម្ពុជានៅមិនទាន់ដោះមីនអស់នៅឡើយ។ ក្នុងនោះសម្ដេចក៏បានអំពាវនាវឱ្យមានការចូលរួមពីប្រជាពលរដ្ឋយ៉ាងផុសផុលលើសកម្មភាពបោសសម្អាតមីនេះផងដែរ៕