ភ្នំពេញ៖ ថវិកាផ្ដល់ពីសម្ដេចតេជោ ហ៊ុន សែន នាយករដ្ឋមន្ត្រី នៃកម្ពុជា ប្រមាណ ៣០លានដុល្លារ អាមេរិក ត្រូវបានបែងចែកទៅកងកម្លាំងចំនួន៣ ដើម្បីធ្វើការងារបោសសំអាត ចម្ការមីន នៅឆ្នាំ២០២៣ ក្នុងខេត្តចំនួន១០ ក្នុងនោះ មានកងកម្លាំងមជ្ឈមណ្ឌលសកម្មកំចាត់មីនកម្ពុជា (CMAC) កងទ័ពជើងគោក និងកងកម្លាំងមួកខៀវ ។

ក្នុងពិធីចុះហត្ថលេខាកិច្ចសន្យា ស្តីពីការបោសសំអាតមីន គាំទ្រពីមូលនិធិកម្ពុជាគ្មានមីនឆ្នាំ២០២៥ រវាងអាជ្ញាធរមីន និងកងកម្លាំងទាំង៣ ធ្វើឡើងនៅថ្ងៃទី២៦ ខែមករា ឆ្នាំ២០២៣ ក្រោមអធិបតីភាព លោកឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរងកងយោធពលខេមរភូមិន្ទ និងជា​មេបញ្ជាការកងទ័ពជើងគោក ​ឯកឧត្តមទេសរដ្ឋមន្ត្រី លី ធុជ អនុប្រធានទី១ អាជ្ញាធរមីន បានមាន​ប្រសាសន៍ថា សម្រាប់ផ្ទៃដីដែលកម្លាំងទាំង៣ ​នឹងត្រូវបោសសំអាត មានចំនួនជាង ១៨០គីឡូ​ម៉ែត្រឡា ខណៈថវិកាបានមកពីប្រទេសជាដៃគូ​ និងសប្បុរសជននានា គឺត្រូវប្រើប្រាស់​លើការងារបោសសំអាតចម្ការមីន នៅទូទាំងប្រទេស ជាច្រើនគីឡូម៉ែត្រក្រឡាទៀត ។

ឯកឧត្តម បានបន្តថា​ ការបោសសំអាតចម្ការមីននេះ នៅឆ្នាំ២០២៣ ​កងកម្លាំងមួកខៀវ នឹង​អនុវត្តនៅខេត្តកោះកុង និងខេត្តមណ្ឌលគិរី ​លើផ្ទៃដីជាង ២៧គីឡូម៉ែត្រក្រឡា, កងទ័ពជើងគោក អនុវត្តនៅខេត្តបន្ទាយមានជ័យ ​ឧត្តរមានជ័យ ​និងខេត្តកំពង់ស្ពឺ ​លើផ្ទៃដីជាង ៤៦គីឡូម៉ែត្រក្រឡា ចំណែកកម្លាំងស៊ីម៉ាក់អនុវត្តនៅខេត្តប៉ៃលិន ​ពោធិ៍សាត់ សៀមរាប ព្រះវិហារ និងខេត្តកំពង់ធំ លើផ្ទៃដីចំនួនជាង ១០៦គូឡូម៉ែត្រក្រឡា ។

ឯកឧត្តម បានបន្តថា សកម្មភាពបោសសំអាតមីន នៅដើមឆ្នាំ២០២៣នេះ បើធៀបនឹងឆ្នាំមុនៗ គឺមានល្បឿនលឿនជាង ព្រោះមានកងកម្លាំងជាច្រើន ត្រូវបានដាក់ពង្រាយនៅទូទាំងប្រទេស រួមទាំង​មានសម្ភារបោសសំអាតទំនើប​ ខណៈថវិកាសម្ដេចតេជោ ៣០លានដុល្លារនេះ អាចធ្វើឲ្យ​មានលទ្ធភាពកាន់តែខ្លាំង ​លើការងារបោសសំអាតចម្ការមីននៅឆ្នាំនេះ ៕អត្ថបទ៖ បាន សុខរិទ្ធិ