ភ្នំពេញ៖ ដើម្បីលើកស្ទួយវិស័យកីឡា និងកិត្តិយសប្រទេសកម្ពុជា​ឱ្យកាន់តែមានឈ្មោះល្បីល្បាញ​បន្ថែមទៀត ​នៅលើឆាកអន្តរជាតិ ក្រុមកីឡាករជម្រើសជាតិ បានប្តេជ្ញាប្រឹងប្រែងឱ្យអស់ពី​សមត្ថភាព ដើម្បីទទួលបានជោគជ័យក្នុងព្រឹត្តិការណ៍ស៊ីហ្គេម លើកទី៣២​ ដែលប្រទេសកម្ពុជា ត្រូវធ្វើជាម្ចាស់ផ្ទះ ។

ក្នុងពេលចូលរួមក្នុងពិធីរាប់ថយក្រោយ១០០ថ្ងៃ ឆ្ពោះទៅព្រឹត្តិការណ៍ស៊ីហ្គេមលើកទី៣២ ​ដែល ត្រូវបាន​ធ្វើឡើងនៅពហុកីឡដ្ឋានជាតិមរតកតេជោ ​កាលពីរសៀលថ្ងៃទី២៥ ​ខែមករា នេះ ក្រុម​កីឡាករ បានបញ្ជាក់អំពីការខិតខំប្រឹងប្រែង​ហ្វឹកហាត់​ជាមួយគ្រូជាប់ជាប្រចាំ ​នាពេលបច្ចុប្បន្នេះ ដើម្បីត្រៀមខ្លួន​ សម្រាប់ការប្រកួតចូលមកដល់ ។

ចំណែកប្រជាពលរដ្ឋ បានបង្ហាញក្តីរំភើបរីករាយ ​នៅពេលដែលប្រទេសកម្ពុជា ​មានលទ្ធភាពធ្វើជា ម្ចាស់​ផ្ទះព្រឹត្តិការណ៍ស៊ីហ្គេមនៅឆ្នាំនេះ ​ព្រោះថា ប្រទេសកម្ពុជា ​បានរង់ចាំឱកាសនេះ ជាច្រើន​ទសវត្សរ៍ មកហើយប្រជាពលរដ្ឋប្ដេជ្ញាជួយគាំទ្រ ​ដោយចូលរួមរាប់ថយក្រោយ និងទៅមើលការ​ប្រកួតកីឡាផងដែរ។

ការធ្វើជាម្ចាស់ផ្ទះកីឡាស៊ីហ្គេម នៅឆ្នាំ២០២៣ គឺជាព្រឹត្តិការណ៍ប្រវត្តិសាស្ត្រថ្មីមួយទៀត ​សម្រាប់ ប្រទេសកម្ពុជា​ ក្រោមការដឹកនាំរបស់គណបក្សប្រជាជនកម្ពុជា​ ដែល​មានសម្តេចតេជោ ហ៊ុន សែន ជាប្រធានគណបក្សនិងជានាយករដ្ឋមន្រ្តី ។

ព្រឹត្តិការណ៍ស៊ីហ្គេមឆ្នាំនេះ​ ដែលនឹងចាប់ផ្ដើមពីថ្ងៃទី៥ ដល់ថ្ងៃទី១៧ ​ខែឧសភា ​ឆ្នាំ២០២៣ នឹង មាន​កីឡាចំនួន៣៨ប្រភេទ រួមមាន ប៉េតង់ តេក្វាន់ដូ ប្រដាល់គុនខ្មែរ បាល់ទាត់ បាល់ទះ បាល់បោះ គុន ល្បុក្កតោ និងកាយវប្បកម្មជាដើម ៕អត្ថបទ៖ ទូច សោភ័ណ