​បាល់ទាត់៖ ​មេធាវី​ដែល​ធ្វើ​ការឱ្យ Lionel Messi ក្នុង​សំណុំរឿង​ក្លែងបន្លំ​ពន្ធ​របស់ខ្លួន​ ត្រូវបាន​បន្ថែម​ទៅក្នុង​ក្រុម​មេធាវី​ការពារ​ក្តី​ឱ្យ​អតីត​ខ្សែការពារ​ក្រុម Barcelona កីឡាករ Dani Alves ដែល​ប្រឈមមុខ​នឹង​ការចោទប្រកាន់​ពីបទ​រំលោភបំពាន​ផ្លូវភេទ​។​

​មេធាវី​ដ៏​ល្បីល្បាញ Cristóbal Martell នឹង​ព្យាយាម​ជួយ Alves ក្នុងការ​ការពារ​រប​ស់​គាត់​ប្រឆាំងនឹង​ការចោទប្រកាន់​ពីបទ​រំលោភ​ផ្លូវភេទ​ដោយ​ស្ត្រី​ម្នាក់​ដែល Alves បាន​ជួប​នៅ​ក្លឹប​រាត្រី​មួយ​ក្នុង​ទីក្រុង Barcelona កាលពី​ថ្ងៃទី៣០ ខែធ្នូ​។ ​Martell គឺជា​ផ្នែក​មួយ​នៃ​ក្រុម​ការពារ​ក្តីនៅពេលដែល Messi ត្រូវបាន​គេ​រកឃើញថា​មាន​ពិរុទ្ធ​ពីបទ​ក្លែងបន្លំ​ពន្ធ ហើយ​ត្រូវបាន​កាត់ទោស​ឱ្យ​ជាប់គុក ២១ខែ​ក្នុង​ឆ្នាំ២០១៦ នៅក្នុង​ប្រទេស​អេ​ស្ប៉ា​ញ ទោះបីជា​ការកាត់ទោស​នេះ​ត្រូវបាន​ព្យួរ ហើយ​តារា​អា​ហ្ស​ង់​ទីន​មិនចាំបាច់​ចំណាយពេល​នៅក្នុង​ឃុំ​ក៏ដោយ​។​

Dani Alves ត្រូវបាន​ឃាត់ខ្លួន​តាំងពី​ថ្ងៃ​សុក្រ បន្ទាប់ពី​ចៅក្រម​បាន​បញ្ជា​ឱ្យ​ឃុំខ្លួន​ដោយ​គ្មាន​លទ្ធភាព​នៅក្រៅ​ឃុំ បន្ទាប់ពី​ការផ្តល់​សក្ខីកម្ម​ពី​ដើមចោទ និង​សាក្សី ទោះបី​បាន​បដិសេធ​រាល់​ការប្រព្រឹត្ត​ខុស​ក៏ដោយ​។​ Alves បានឈ្នះ​ពាន​ចំនួន ៤២ ក្នុង​អាជីព​បាល់ទាត់​របស់ខ្លួន​រួមមាន Champions League បី​ជាមួយ Barcelona និង Copa America ពីរ​ជាមួយ​ប្រេ​ស៊ី​ល​។ Alves បានបង្ហាញ​ខ្លួន​នៅ World Cup លើក​ទី​បី​ក្នុង​អាជីព​នៅ​ប្រទេស​កាតា​ផងដែរ​៕

​អត្ថបទ​៖​នាង សុភា​វុ​ធ