​បាល់ទាត់៖ បន្ទាប់ពី Real Madrid ឈរជើង​នៅ​កំពូល​តារាង​ក្របខណ្ឌ​អេ​ស្ប៉ា​ញ La Liga​ បាន​មួយថ្ងៃ Atletico Madrid នៅ​ពេល​នេះ​បាន​ត្រលប់​មក​កំពូល​តារាង​វិញ​ ក្រោយ​ជ័យជំនះ​លើ​ក្រុម​ភ្ញៀវ Huesca ២-០​។

​​ពីរ​គ្រាប់​របស់ Angel Correa និង Yannick Carrasco ក្នុង​វគ្គ​នីមួយៗគ្រប់គ្រាន់​ល្មម​នឹង​ទទួលបាន​បី​ពិន្ទុ​សំរាប់ក្រុម​ម្ចាស់ផ្ទះ Atletico Madrid លើ​ក្រុម​ដែល​កំពុង​ត្រូវការ​ឈ្នះ​ដាច់ខាត Huesca ​ដែល​កំពុង​ស្ថិតក្នុង​តំបន់​គ្រោះថ្នាក់​។ ​​បី​ពិន្ទុ​នេះ​ធ្វើអោយ​ក្រុម​របស់លោក Diego Simeone ​កាន់កាប់​កំពូល​តារាង​ដាច់​ក្រុម​លេខ២ Real Madrid បី​ពិន្ទុពេញ​។ ​​Atletico Madrid កំពុង​ស្វែង​រកពាន La Liga​ ជា​លើកដំបូង​រាប់​ពី​ឆ្នាំ២០១៤ ខណៈ​នៅសល់ ៦ប្រកួត​ទៀត​ចប់ រដូវ​កាល ​ក្នុងនោះ​មាន​មួយ​ប្រកួត​ត្រូវ​ទៅ​ទឹកដី Barcelona ថ្ងៃទី៨ ខែក្រោយ​។ ​​ចំណែក Huesca​ បរាជ័យ​នៅពេលនេះ ​ធ្វើអោយ​ពួកគេ​បន្ត​ឈរ​ក្នុង​តំបន់​កាត់ចោល​លេខ ១៨ ដេញ​ពីក្រោយ Real Valladolid ដែល​ឈរ​នៅ​តំបន់​សុវត្ថិភាព​មួយ​ពិន្ទុ​។

ងាក​មក Barcelona វិញ​ក៏​រកបាន​បី​ពិន្ទុ​ដ៏​មាន​សារសំខាន់​របស់ខ្លួន​ដែរ ​ក្នុងការ​ប្រកួត​ជើងឯក​ដោយបាន​បំបាក់​ក្រុម​ភ្ញៀវ Getafe ៥-២​។ ​ខ្សែប្រយុទ្ធ​អា​ហ្ស​ង់​ទីន Lionel Messi រកបាន​ពីរ​គ្រាប់​ម្នាក់ឯង​នៅ​នាទី​ទី៨ និង ៣៣ ខណៈដែល​ខ្សែប្រយុទ្ធ​បារាំង Antoine Griezmann​ រកបាន​គ្រាប់​ចុងក្រោយ​នៅ​នាទី​ទី៩០+៣ ដោយ​បាល់ ១១ម៉ែត្រ​។ ​​បី​ពិន្ទុ​នេះ Barcelona នៅតែ​បន្ត​ឈរ​លេខ៣ ដដែល​ដេញ​ពីក្រោយ Real Madrid ១ពិន្ទុ និង​ដេញ​ពីក្រោយ​ក្រុមកំពូល​តារាង Atletico Madrid ៥ពិន្ទុ​តែ Barcelona នៅសល់ ១ប្រកួត​នៅក្នុង​ដៃ​៕

​អត្ថបទ​៖​នាង សុភា​វុ​ធ