កោះកុង៖ មន្រ្តីសាខាពន្ធដារខេត្តកោះកុង បាននឹងកំពុងចុះត្រួតពិនិត្យ ក៏ដូចជាផាកពិន័យ​ចំពោះ​ម្ចាស់​យានយន្តណា ដែលខកខានពុំបានបង់ពន្ធលើមធ្យោបាយយានជំនិះគ្រប់ប្រភេទ​សម្រាប់​ឆ្នាំ២០២២។

លោក ឡុង ស៊ីប៉ូ អនុប្រធានសាខាពន្ធដារខេត្តកោះកុង បានឱ្យដឹងថា ក្រុមការងាររបស់លោក បានអនុវត្តការត្រួតពិនិត្យលើមធ្យោបាយដឹកជញ្ជូន និងយានជំនិះគ្រប់ប្រភេទលើកំណាត់ផ្លូវជាតិ​លេខ៤៨ ស្ថិតនៅចំណុចអូរស្រីស្រណោះ​ ក្នុងសង្កាត់ស្មាច់មានជ័យ​ ក្រុងខេមរភូមិន្ទ តាំងតែ​ពីថ្ងៃទី១៥ ខែមករា មកម្ល៉េះ ។

លោក បានបញ្ជាក់ថា គិតមកទល់ថ្ងៃទី២៥ ខែមករា នេះ ​មានយានយន្តជាង២០គ្រឿងហើយដែល​ត្រូវបានផាកពិន័យ​ ដោយសារម្ចាស់យានយន្ត ​ពុំបានបំពេញកាតព្វកិច្ចបង់ពន្ធត្រឹមត្រូវតាមច្បាប់​ពន្ធដារ។ ​កាលបំណាច់ខែវិច្ឆិកា ឆ្នាំ២០២២ ​ក៏មានយានយន្តប្រមាណ១៣២គ្រឿងផងដែរ រងការពិន័យ ។

យានយន្តរដ្ឋលើកលែងពន្ធ រួមមាន៖ ម៉ូតូ រថយន្តសង្គ្រោះបន្ទាន់​ រថយន្តយោធា នគរបាល គ្រឿង​យន្តធ្វើកសិកម្ម រថយន្តស្ថានទូត និងរថយន្ត ​ដែលប្រើប្រាស់ដោយអង្គការអន្តរជាតិនានា ។

នៅឆ្នាំ២០២២ ​សាខាពន្ធដារខេត្តកោះកុង ​ទទួលចំណូលបានមកពីការបង់ពន្ធលើមធ្យោបាយ និងយានជំនិះគ្រប់ប្រភេទ​ ប្រមាណជាង៣ពាន់លានរៀល ស្មើនឹងយានយន្តចំនួន៦.៥៩៩គ្រឿង ។ តួលេខនេះ បើធៀបនឹងឆ្នាំ២០២១​ កើនជាង២១លានរៀល។ ​ចំពោះការពិន័យម្ចាស់យានយន្ត បានថយ​ចុះ៦២គ្រឿង ស្មើនឹងទឹកប្រាក់១៧លានរៀល ។

មន្រ្តីពន្ធដារខេត្តកោះកុង បានវាយតម្លៃថា ពលដ្ឋម្ចាស់យានយន្ត មានការយល់ដឹងច្រើន​ហើយ​ពី​កាតព្វកិច្ច​បង់ពន្ធលើមធ្យោបាយដឹក​ជញ្ចូន ​និងយានជំនិះគ្រប់ប្រភេទ ​ពីមួយឆ្នាំទៅមួយឆ្នាំ ៕អត្ថបទ៖ ឈឹម មករា