​ភ្នំពេញ៖ បណ្ឌិត្យសភានគរបាលកម្ពុជា នៅថ្ងៃទី២៦ ខែមករា ឆ្នាំ២០២៣ នេះ បានរៀបចំសន្និបាទបូកសរុបត្រួតពិនិត្យលទ្ធផលការងារប្រចាំឆ្នាំ២០២២ និងលើកទិសដៅការងារបន្តសម្រាប់ឆ្នាំ២០២៣ របស់ខ្លួន។

បណ្ឌិត្យសភានគរបាលកម្ពុជា បានរៀបចំសន្និបាទបូកសរុបត្រួតពិនិត្យលទ្ធផលការងារប្រចាំឆ្នាំ២០២២ និងលើកទិសដៅការងារបន្តសម្រាប់ឆ្នាំ២០២៣ របស់ខ្លួន។ ក្នុងឱកាសបើកសន្និបាទនេះ ឯកឧត្តម នាយឧត្ដមសេនីយ៍ សេង ផល្លី ប្រធានបណ្ឌិត្យសភានគរបាលកម្ពុជា បានលើកឡើងថា ដើម្បីសម្រេចបាននូវភារកិច្ចស្នូលរបស់ខ្លួន បណ្ឌិត្យសភានគរបាលកម្ពុជា បានដាក់ចេញ នូវផែនការយុទ្ធសាស្ត្ររយៈពេល៥ឆ្នាំដំណាក់កាលទី២(២០១៩-២០២៣)។

លើសពីនេះ គឺអនុវត្តកម្មវិធីកំណែទម្រង់លើការងារសំខាន់ៗជាច្រើន ទាក់ទងនឹងការដឹកនាំ-គ្រប់គ្រង ការអភិវឌ្ឍកម្មវិធីអប់រំ ការអភិវឌ្ឍសមត្ថភាពគ្រូបង្រៀននិងធនធានមនុស្ស ការអភិវឌ្ឍហេដ្ឋារចនាសម្ព័ន្ធនិងសម្ភារៈសិក្សា ការស្រាវជ្រាវវិទ្យាសាស្រ្តនគរបាល ព្រមទាំងការពង្រឹងនិងពង្រីកកិច្ចសហការប្រតិបត្តិការជាតិនិងអន្តរជាតិ សំដៅលើកកម្ពស់គុណភាពអប់រំបណ្តុះបណ្ដាល និងធានាឱ្យមានភាពម្ចាស់ការលើការបណ្តុះបណ្តាលឱ្យឆ្លើយតបទៅនឹងតម្រូវការអង្គភាពប្រើប្រាស់កងកម្លាំង ផែនការអភិវឌ្ឍន៍ធនធានមនុស្សរបស់ក្រសួងមហាផ្ទៃ និងគោលនយោបាយរបស់រាជរដ្ឋាភិបាល។

ក្នុងនាមជា ប្រធានបណ្ឌិត្យសភានគរបាលកម្ពុជា ឯកឧត្តមក៏បានថ្លែងកោតសរសើរ ចំពោះថ្នាក់ដឹកនាំ សាស្រ្តាចារ្យ គ្រូនគរបាលជាតិ និងមន្ត្រីទាំងអស់នៃបណ្ឌិត្យសភា ដែលបានខិតខំបំពេញភារកិច្ចដោយស្មារតីទទួលខុសត្រូវ មានការប្ដេជ្ញាចិត្តខ្ពស់ មានឆន្ទៈមោះមុត និងមានសាមគ្គីភាពផ្ទៃក្នុងល្អ ដើម្បីជំរុញឱ្យបណ្ឌិត្យសភាមានការអភិវឌ្ឍយ៉ាងខ្លាំង ឈានទៅសម្រេចបានតាមចក្ខុវិស័យ គោលបំណង បេសកកម្ម គោលដៅ និងគុណតម្លៃដែលបានកំណត់។

បណ្ឌិត្យសភានគរបាលកម្ពុជានៅថ្ងៃនេះ ក៏នឹងពិភាក្សាលើប្រធានបទសំខាន់ៗចំនួ៥ ដើម្បីបង្ហាញអំពីបទពិសោធល្អៗ ចំណុចខ្លាំង ចំណុចខ្សោយ បញ្ហាប្រឈម ដំណោះស្រាយ និងសមិទ្ធផលនានាដែលសម្រេចបានក្នុងឆ្នាំ២០២២កន្លងទៅ ព្រមទាំងដាក់ចេញនូវទិសដៅការងារសម្រាប់ឆ្នាំ២០២៣៕ អត្ថបទ៖ គឹមហុក