ភ្នំពេញ៖ មជ្ឈមណ្ឌលសកម្មភាពកំចាត់មីនកម្ពុជា (CMAC) បានចុះហត្ថលេខា លើសេវាកម្ម ប្រឹក្សា សម្រាប់គម្រោងសាងសង់​មជ្ឈមណ្ឌល​ហ្វឹកហ្វឺន និងសារមន្ទីរ នៃមជ្ឈមណ្ឌលសកម្ម ភាពកំចាត់មីនកម្ពុជា ។

ការចុះ MOU នេះ ធ្វើឡើងរវាងឯកឧត្តម ហេង រតនា អគ្គនាយកស៊ីម៉ាក់ និងលោក Kazuhiro MIYATAKE ប្រធានក្រុមប្រឹក្សាបច្ចេកទេស នៃក្រុមហ៊ុន OC GIOBAL នៅរសៀលថ្ងៃទី២៦ ខែមករា ឆ្នាំ២០២៣ ដោយក្រោយពីការចុះហត្ថលេខានេះ ក្រុមការងារទីប្រឹក្សាជប៉ុន នឹងចុះវាយតម្លៃលម្អិតអំពីប្លង់ទាំងពីរ និងពិនិត្យទីតាំងសាងសង់ជាក់ស្តែង ។

ឯកឧត្តម ហេង រតនា មានប្រសាសន៍ថា រដ្ឋាភិបាលភិបាលជប៉ុនតាមរយៈ JICA បានសម្រេចផ្ដល់ហិរញ្ញប្បទានឥតសំណង ជូនរាជរដ្ឋាភិបាល​ផ្ដល់ជូនអង្គភាព CMAC សម្រាប់គម្រោងសាងសង់អាគារហ្វឹកហ្វឺន និងអាគារផ្សព្វផ្សាយអប់រំយល់ដឹងពីសង្គ្រាម ដែលមានទឹកប្រាក់សរុបចំនួន ២ ៤៥១លានយ៉េង ប្រមាណ១៧.៥លានដុល្លារអាមេរិក ។

ឯកឧត្តម បានបង្ហាញនូវជំនឿយ៉ាងមុតមាំថា សារមន្ទីរសន្ដិភាពសកម្មភាពមីន នឹងក្លាយជាមរតកជាតិមួយក្នុងការដាក់បង្ហាញមតិជាតិ និងអន្ដរជាតិ ឲ្យកាន់តែយល់ច្បាស់ថែមទៀតនូវការខិតខំពុះពារប្ដូរផ្ដាច់របស់សម្ដេចតេជោ ក្នុងការបញ្ចប់សង្គ្រាមនៅកម្ពុជា និងបានកសាងសន្ដិភាពយ៉ាងពេញលេញពិតប្រាកដមួយ សម្រាប់ប្រជាជន និងប្រទេសជាតិដ៏កំសត់នេះ ។

ឯកឧត្តមអគ្គនាយក បានបន្ថែមថា សារមន្ទីរសន្តិភាពនឹងក្លាយជាឃ្លាំងចំណេះដឹង និងព័ត៌មានចងចាំពីទុក្ខសោកវេទនា​របស់​ប្រជាជនកម្ពុជា​ឆ្លងកាត់សង្គ្រាម និងសំណល់យុទ្ធភណ្ឌសង្គ្រាម និងស្វែងយល់ព្រមទាំងតំកល់តំលៃសន្តិភាពជាមរតកដ៏មហាសាល ហើយ​សារមន្ទីរសន្តិភាពនេះ ផ្តោតលើទស្សនសារមន្ទីរស៊ីវិល ដូចជាសារមន្ទីរនៅហ៊ីរ៉ូស៊ីម៉ា និងអូគីណាវ៉ានៃប្រទេសជប៉ុនអញ្ចឹងដែរ ។ ខាងJICA ក៏បានគិតគូរ និងខិតខំកៀរគរអ្នកជំនាញមកពីហ៊ីរ៉ូស៊ីម៉ានិងអូគីណាវ៉ា មកសហការគាំទ្រដល់អង្គភាពស៊ីម៉ាក់ ដើម្បីរៀបចំសារមន្ទីរសន្តិភាពឱ្យកាន់តែទំនើបទាំងប្រពន្ធ័គ្រប់គ្រង សម្ភារបំពាក់ផងដែរ ៕ អត្ថបទ ៖ បាន សុខរិទ្ធិ