ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជា នៅតែបង្ហាញមោទនភាពចំពោះ​សុខដុមនីយកម្ម​ខាងសាសនានៅកម្ពុជា​ក្រោមគោលនយោបាយដ៏ត្រឹមត្រូវរបស់រាជរដ្ឋាភិបាល​ហើយសម្តេចនៅតែរំលឹកថា ដូចដែលសម្តេចធ្លាប់បាននិយាយច្រើនដងហើយថា ការប្រកាន់យក​គោរពសាសនាខុសៗនៅកម្ពុជាមិនមែនជាឧបសគ្គសម្រាប់ការកសាងប្រទេសជាតិឡើយ។

ថ្លែងនៅក្នុងពិធីអបអរសាទរខួប១០០ឆ្នាំនៃវត្តមានសាសនាគ្រិស្តនៅកម្ពុជា នៅមជ្ឈមណ្ឌលកោះពេជ្រ នាព្រឹកថ្ងៃទី២៧មករានេះ។

សម្តេច មានប្រសាសន៍បន្តថា កម្ពុជាកាន់តែមានមោទនភាពយ៉ាងខ្លាំងចំពោះប្រជាពលរដ្ឋរបស់ខ្លួន​ដែលប្រកាន់ខ្ជាប់សាសនាផ្សេងៗគ្នា ប៉ុន្តែមានសាមគ្គីភាពគ្នាយ៉ាងល្អប្រសើរដែលមិនត្រឹម​តែជា​មោទនភាពសម្រាប់កម្ពុជាប៉ុណ្ណោះទេ ប៉ុន្តែក៏ជាមោទនភាពសម្រាប់ប្រទេសក្នុងតំបន់ និងពិភព​លោកផងដែរ។ សម្ដេច បានបន្ថែមថា បណ្តាប្រទេសជាច្រើនបានកោតសរសើរចំពោះ​សុខដុមនីយកម្ម​សាសនានៅកម្ពុជា តាមរយៈគោលនយោបាយដ៏ត្រឹមត្រូវរបស់​រាជរដ្ឋាភិបាល​ដែលមានកិច្ចសហការល្អជាមួយស្ថាប័ន អង្គភាព ក៏ដូចជាដៃគូពាក់ព័ន្ធ ដើម្បីធ្វើឲ្យមានប្រសិទ្ធភាព​ខ្ពស់​លើការងារបង្ករការងាយស្រួលដល់ប្រជាជនគ្រប់សាសនា។

សម្ដេចតេជោ ហ៊ុន សែន នៅតែបញ្ជាក់ថា សន្តិភាពដែលយើងរកបាន មិនមែនសម្រាប់តែ​ព្រះពុទ្ធសាសនា ដែលជាសាសនារបស់រដ្ឋ ឬសម្រាប់អ្នកណាមួយនោះទេ យើងបានទទួល​ផលប្រយោជន៍​ពីសន្តិភាពតាមរយៈនយោបាយឈ្នះ-ឈ្នះទាំងអស់គ្នា រាប់ទាំងគ្រិស្ត​សាសនា​ផងដែរ។ដូច្នេះពិតណាស់ថា យើងត្រូវរួមគ្នាថែរក្សាសន្តិភាពដែលយើងរកបានដោយលំបាកនេះ ហើយពាក្យអរគុណសន្តិភាពបាននឹងកំពុងលាន់ឮរំពងនៅទូទាំងព្រះរាជាណាចក្រកម្ពុជា៕