ភ្នំពេញ៖ លោក អ៊ុន ជឹម ប្រធានគណបក្សឯកភាពជាតិខ្មែរ បានថ្លែងថា គោលយោបាយរបស់​គណបក្ស​លោក ពុំមានការជេរប្រមាថ ការលាបពណ៌ ការចោទប្រកាន់ និងការញុះញង់ដល់​គណបក្សដទៃនោះទេ ហើយលោកក៏បានប្រកាសគាំទ្រចំពោះប្រសាសន៍សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា ដោយបានអំពាវនាវដល់បណ្តាគណបក្សនយោបាយ​ទាំងអស់កុំឲ្យធ្វើការ​ឃោសនា​ជេរប្រមាថដល់គណបក្សផ្សេងៗ ដើម្បីតែផលប្រយោជន៍គណបក្សខ្លួននោះដែរ។

នៅក្នុងសន្និសីទសារព័ត៌មានកាលពីល្ងាចថ្ងៃទី២៦ ខែមករា ឆ្នាំ២០២៣ម្សិលមិញនេះ លោក អ៊ុន ជឹម បានលើកឡើងថា ការជេរប្រមាថ ការលាបពណ៌ ការចោទប្រកាន់ និង ការញុះញង់នាំឲ្យជាតិ​បែក​​បាក់ និងជាផែនការបំបែកបំបាក់របស់​បរទេសមកលើខ្មែរជាង៧០០ឆ្នាំហើយ។ ដូច្នេះក្នុងនាមលោកជាប្រធានគណបក្សមួយរូបដែរនោះ លោកសូមស្នើដល់អ្នកនយោបាយ​គ្រប់រូប​ពិចារណាឲ្យបានគ្រប់ជ្រុងជ្រោយ កុំព្រោះតែចង់ល្បីហើយជេរប្រមាថ និងលាបពណ៌ដល់​គណបក្សអ្នកដទៃ​ហើយគិតថា គណបក្សខ្លួនល្អ។

ជាមួយគ្នានោះដែរ ប្រធានគណបក្សឯកភាពជាតិខ្មែរ ក៏បានសម្តែងការហួសចិត្ត ចំពោះអ្នក​នយោបាយ​មួយចំនួន និងអ្នកវិភាគមួយក្តាប់តូចដែលងប់ងុលនឹងការប្រឆាំង និងការចង់បំផ្លាញ​ដៃគូប្រកួត តែងតែធ្វើនយោបាយជេរគេ ដោយចោទគេថា អាយ៉ងអ្នកនេះអាយ៉ងអ្នក​នោះជាដើមនោះ។

លោកថា គណបក្សមួយចំនួនដែលលើកឡើងថា គណបក្សកាន់អំណាច កើតឡើងចេញពីប្រភព​នេះប្រភពនោះ ​គឺជាការធ្វើនយោបាយដោយគ្មានសីលធម៌។ ការចោទប្រកាន់ដោយគ្មានភស្តុតាង គឺជាការ​បរិហារកេរ្តិ៍ ​ដែលប្រឈមមុខនឹងច្បាប់ ។ ហេតុនេះហើយ បានជាគណបក្សឯកភាពជាតិខ្មែរ មិនឲ្យសកម្មជនធ្វើនយោបាយ វាយប្រហារបក្សដទៃឡើយ៕អត្ថបទ៖ បាន ចក់