វ៉ូវីណាម៖ ឯកឧត្តម អ៊ូ រតនា ប្រធានសហព័ន្ធកីឡាវ៉ូវីណាមកម្ពុជាកាលពីថ្ងៃទី២៦ ខែមករា បានធ្វើការចែកសៀវភៅ “កូនប្រុសច្បងនាយករដ្ឋមន្ត្រី ដំណើរឆ្ពោះទៅការបន្តវេន ហ៊ុន ម៉ាណែត” ដល់សមាជិកគណៈកម្មាធិការប្រតិបត្តិសហព័ន្ធ គ្រូបង្វឹក និងកីឡាករ-កីឡាការិនីរបស់ខ្លួនសរុបជិត ១០០ក្បាលនៅក្នុងមជ្ឈមណ្ឌលជាតិហ្វឹកហ្វឺនកីឡា។
ប្រធានសហព័ន្ធដដែលបន្ដថា ការចែកសៀវភៅថ្នាក់ដឹកនាំនេះគឺជាអំណោយដ៏ថ្លៃថ្លារបស់ឯកឧត្ដមបណ្ឌិត ហ៊ុន ម៉ាណែត តបតាមការស្នើសុំរបស់កីឡាករ-កីឡាការិនីតាមរយៈសហព័ន្ធ ដើម្បីបានអាន និងស្វែងយល់អំពីអត្ថន័យនៃសៀវភៅនេះ។ ក្នុងនាមសហព័ន្ធ ឯកឧត្តមបានថ្លែងអំណរគុណឯកឧត្តមបណ្ឌិត ហ៊ុន ម៉ាណែត ដែលបានផ្ដល់នូវសៀវភៅអនុស្សាវរីយ៍ដ៏មានតម្លៃនេះ។
ជាមួយគ្នាដែរ ឯកឧត្តម អ៊ូ រតនា ក៏បានបញ្ជាក់ដែរថា បច្ចុប្បន្នកីឡាវ៉ូវីណាមកម្ពុជា ពិសេសក្រុមជម្រើសជាតិកម្ពុជា កំពុងតែខិតខំប្រឹងប្រែងហ្វឹកហាត់ជាខ្លាំង ដើម្បីសម្រួចទិសដៅឆ្ពោះទៅស៊ីហ្គេមលើកទី៣២ នាពេលខាងមុខ ដែលគិតត្រឹមថ្ងៃទី២៧ ខែមករានេះគឺនៅសល់ ៩៨ថ្ងៃទៀតប៉ុណ្ណោះសម្រាប់ដំណើរឆ្ពោះទៅព្រឹត្តិការណ៍ជាប្រវត្តិសាស្ដ្រនេះ ដើម្បីធ្វើការប្រកួតប្រជែងដណ្ដើមបានមេដាយមាសឲ្យបានច្រើនជូនជាតិមាតុភូមិ៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
