ភ្នំពេញ៖ ឯកឧត្តមបណ្ឌិត ឈឹម ឃិនដារ៉េត អគ្គលេខាធិការ និងជាប្រធានក្រុមប្រឹក្សាបច្ចេកទេស​អាជ្ញាធរជាតិប្រយុទ្ធ នឹងជំងឺអេដស៍ បានដឹកនាំកិច្ចប្រជុំក្រុមប្រឹក្សាបច្ចេកទេសអាជ្ញាធរជាតិប្រយុទ្ធ នឹងជំងឺអេដស៍លើកទី១ ឆ្នាំ២០២៣, ​នាព្រឹកថ្ងៃទី២៧ ខែមករា ឆ្នាំ២០២៣​នេះតាមរយៈការ​ចូលរួមផ្ទាល់ និងតាមប្រព័ន្ធអនឡាញ​ ដោយមានការអញ្ជើញចូលរួមពីសមាជិក សមាជិកា ដែលជាមន្ត្រីបច្ចេកទេសអន្តរក្រសួង ស្ថាប័ន រាជធានី ខេត្ត និងអង្គការដៃគូ។

កិច្ចប្រជុំបានធ្វើការពិភាក្សាលើរបៀបវារៈ ​នៃការសិក្សាអំពីលទ្ធភាពផ្តល់បណ្ណសមធម៌ ​និងបណ្ណ ប.ស.ស ដល់ក្រុមប្រជាជនគន្លឹះ។

ថ្លែងក្នុងឱកាសបើកកិច្ចប្រជុំ ឯកឧត្តមបណ្ឌិត ឈឹម ឃិនដារ៉េត បានមានប្រសាសន៍ថា ក្រុមប្រឹក្សា​បច្ចេកទេសមានតួនាទីជាសេនាធិការបច្ចេកទេស ជូនអាជ្ញាធរជាតិប្រយុទ្ធ ​នឹងជំងឺអេដស៍ ក្នុងការរៀបចំគោល​នយោបាយជាតិប្រយុទ្ធ នឹងជំងឺអេដស៍ រៀបចំយុទ្ធសាស្ត្រសម្រាប់​អនុវត្តគោល​នយោបាយជាតិ រៀបចំផែនការសកម្មភាព ​ជួយណែនាំការអនុវត្តគោលនយោបាយ ផែនកា​រ​យុទ្ធសាស្ត្រ ផែនការសកម្មភាព ដើម្បីឆ្លើយតបដោយប្រសិទ្ធភាព ទៅនឹងតម្រូវការ នៃស្ថានភាពមេរោគអេដស៍។

រាជរដ្ឋាភិបាលកម្ពុជា បានប្តេជ្ញាចិត្ត ដើម្បីសម្រេចបាននូវគោលដៅ ​៩៥-៩៥-៩៥ នៅឆ្នាំ ២០២៥។ នៅឆ្នាំ២០២១នេះ ​កម្ពុជាសម្រេចបាន ៨៤ ភាគរយ នៃអ្នកផ្ទុកមេរោគអេដស៍ទាំងអស់​បានដឹង​ពីស្ថានភាពរបស់ខ្លួន ក្នុងចំណោមអ្នកដែលដឹងថាខ្លួនមានផ្ទុកមេរោគអេដស៍ ៩៩ ភាគរយ បាន​ធ្វើ​រោគ​វិនិច្ឆ័យ​ និងទទួលការព្យាបាល ​និង៩៧ ភាគរយ ​នៃអ្នកផ្ទុកមេរោគអេដស៍ ដែលបានទទួល​ការ​ព្យាបាលមានអត្រាមេរោគតិចបំផុតមិនអាច​ជាការ​គំរាម​ ចំពោះសុខភាពរបស់អ្នកផ្ទុក​មេរោគអេដស៍។

តាមរយៈលិខិតលេខ ២១៣ សជណ.សស ចុះថ្ងៃទី២១ ខែកុម្ភៈ ឆ្នាំ២០១៩ អំពីការដាក់វិធានការ​ទាក់ទង​នឹងការឆ្លើយតបទៅនឹងមេរោគអេដស៍​ និងជំងឺអេដស៍ ​របស់ទីស្តីការគណៈរដ្ឋមន្រ្តី រាជ​រដ្ឋាភិបាលកម្ពុជា ​បានទទួលស្គាល់​ និងផ្តល់ជូនអ្នកផ្ទុកមេរោគអេដស៍ទាំងអស់ ​នូវបណ្ណក្រីក្រ ឬបណ្ណសមធម៌។

ឯកឧត្តមបណ្ឌិត ឈឹម ឃិនដារ៉េត ​បានបញ្ជាក់ថា កិច្ចប្រជុំថ្ងៃនេះ គឺដើម្បីប្រមូលនូវធាតុចូលបន្ថែម​ពី​សមាជិក លើសម្រង់ ទិន្នន័យបឋមនៃចំនួនប្រជាជនគន្លឹះ ​ដែលបានគ្របដណ្ដប់នៅទូទាំងរាជធានី ខេត្ត ​និងជម្រើសវិធីសាស្ត្រ និងតិវិធី ​ពាក់ព័ន្ធមួយចំនួន​ ក្នុងការផ្តល់បណ្ណ សមធម៌ ​ក៏ដូចជាបណ្ណ ប.ស.ស. ជូនដល់ប្រជាជនគន្លឹះ ដែលជាក្រុមប្រឈមមុខខ្ពស់ ​នឹងឆ្លងមេរោគអេដស៍៕អត្ថបទ រដ្ឋា