អាហ្វហ្គានីស្ថាន៖ មន្ត្រីជាន់ខ្ពស់អង្គការសហប្រជាជាតិបាននិយាយថា រដ្ឋាភិបាលដឹកនាំដោយក្រុមតាលីបង់នៅក្នុងប្រទេសអាហ្វហ្គានីស្ថាន មានផែនការបង្កើតច្បាប់ថ្មីដើម្បីអនុញ្ញាតឱ្យស្ត្រីធ្វើការក្នុងប្រតិបត្តិការមនុស្សធម៌បានមួយចំនួន។
ថ្លែងទៅកាន់សារព័ត៌មាន BBC អគ្គលេខាធិការរងអង្គការសហប្រជាជាតិទទួលបន្ទុកកិច្ចការមនុស្សធម៌លោក Martin Griffiths បាននិយាយថា លោកបានទទួលការឆ្លើយតបលើកទឹកចិត្តពីរដ្ឋមន្ត្រីក្រុមតាលីបង់ជាច្រើននាក់ ក្នុងអំឡុងពេលកិច្ចពិភាក្សានៅទីក្រុងកាប៊ុល ទោះបីជាមានបទបញ្ជាកាលពីខែមុនដែលបានដាក់បម្រាមលើស្ត្រីអាហ្វហ្គានីស្ថាន ធ្វើការឱ្យអង្គការមិនមែនរដ្ឋាភិបាលផ្អាកប្រតិបត្តិការក៏ដោយ។ នៅឆ្នាំនេះទីភ្នាក់ងារនានានឹងព្យាយាមទៅដល់ប្រជាជនអាហ្វហ្គានីស្ថានចំនួន ២៨លាននាក់ ច្រើនជាងពាក់កណ្តាលនៃចំនួនប្រជាជនសរុបដែលរួមមាន ៦លាននាក់កំពុងរងផលប៉ះពាល់ដោយគ្រោះទុរ្ភិក្ស។
ក្នុងសប្តាហ៍នេះលោក Griffiths មានជំនួបជាបន្តបន្ទាប់នៅទីក្រុងកាប៊ុល ជាមួយមេដឹកនាំជាន់ខ្ពស់របស់រដ្ឋាភិបាលតាលីបង់ អំពីបទបញ្ជាដែលបានដាក់បម្រាមលើស្ត្រីអាហ្វហ្គានីស្ថាន មិនឱ្យធ្វើការជាមួយអង្គការផ្តល់ជំនួយ។ លោកនិយាយថា ប្រសិនបើស្ត្រីមិនធ្វើការក្នុងប្រតិបត្តិការមនុស្សធម៌ យើងនឹងមិនទៅដល់ យើងមិនអាចរាប់ចំនួនស្ត្រី និងកុមារីដែលយើងត្រូវស្តាប់អំពីពួកគេនោះទេ។ នៅក្នុងប្រតិបត្តិការមនុស្សធម៌ទាំងអស់ជុំវិញពិភពលោក ស្ត្រី និងកុមារីគឺជាអ្នកដែលងាយរងគ្រោះបំផុត៕
អត្ថបទ៖ ប៊ុនថន