បាល់ទាត់៖ ​កីឡដ្ឋាន Wembley ​ក្នុង​ទីក្រុង​ឡុង​ដ៍​ចក្រភព​អង់គ្លេស អាច​នឹង​ត្រូវ​ទទួល​ការប្រកួត​ច្រើន​ប្រកួត​ទៀត​នៅ Euro ២០២០ បន្ទាប់ពី UEFA ថា​ ទីក្រុង​ម្ចាស់ផ្ទះ​ផ្សេងទៀត​មិន​ច្បាស់លាស់​ពី​ការ​រៀប​ចំ​របស់​ខ្លួន​។ ​ទីក្រុង Dublin សាធារណរដ្ឋ​អៀក​ឡង់, ទីក្រុង Bilbao ប្រទេស​អេ​ស្ប៉ា​ញ និង​ទីក្រុង Munich ប្រទេស​អាល្លឺម៉ង់ ជាទី​ក្រុង​បី​ដែល​ស្ថិតក្នុង​មន្ទិល​នៅ​ឡើយ​មកដល់ពេលនេះ​។

ទីក្រុង Dublin មានឈ្មោះ​ទទួល​ចំនួន ​៤​ប្រកួត​ដែល​អាច​នឹង​ត្រូវ​ផ្លាស់ប្ដូរ​ទីតាំង​ប្រកួត ស្រប​ពេល​ទីក្រុង Bilbao អាច​នឹង​ត្រូវ​ផ្លាស់​មកកាន់​ទីក្រុង Seville ដោយសារ​បញ្ហា Covid-19​។ សំរាប់ Wembley ​ដែល​នឹង​ទទួល​រ៉ាប់រង​នោះ​ទំនងជា​ការប្រកួត​វគ្គ ១៦​ក្រុម​ចុងក្រោយ​នៃ​ក្រុម​ឈ្នះ​ពី​ពូ​ល​របស់​ក្រុម​ជំរើស​ជាតិ​អង់គ្លេស​។ ​ដូច្នេះ​ប្រសិន​អង់គ្លេស​បាន​លេខ ១ ក្នុង​ពូ​ល D ដែល​រួមមាន​ស្កុ​ត​ឡេ​ន ក្រូ​អាស៊ី និង​ឆេ​ក​នោះ ពួកគេ​នឹង​ជួប​ជាមួយ​ក្រុម​លេខ ២ ក្នុង​ពូ​ល F ដែល​គ្រោង​នឹង​ធ្វើ​ឡើង​នៅ Wembley​។​ ​បញ្ហា​ដែល​ចោទ​សំរាប់​ទីក្រុង​ខាងលើ​នោះ​គឺ UEFA បាន​ដាក់​កំណត់​ឲ្យទីក្រុង​ម្ចាស់​ផ្ទះ​ បើកឲ្យ​មាន​អ្នកទស្សនា​យ៉ាង​ហោច​ណាស់ ២៥% ​ក្នុង​កីឡដ្ឋាន​។

​​ទីក្រុង Munich ប្រទេស​អាល្លឺម៉ង់​មក​ដល់​ពេលនេះ​ ក៏​មិន​ទាន់​បាន​អះអាង​ពី​ការធានា​របស់​ខ្លួន​នៅ​ឡើយ​ ខណៈ​រដ្ឋធានី​នៃ​ប្រទេស​អាល្លឺម៉ង់​មួយ​នេះ ​ត្រូវ​ទទួល​ការប្រកួត​ក្នុង​ពូ​ល F បី​ប្រកួត និង​វគ្គ ៨ក្រុម​ចុងក្រោយ​មួយ​ប្រកួត​។​ ​ព្រឹត្តិការណ៍​បាល់ទាត់​ជើងឯក​ទ្វីប​អឺរ៉ុប Euro ២០២០ ត្រូវ​​បាន​លើក​មួយ​ឆ្នាំ​មកដល់​ឆ្នាំ​២០២១ នេះ​ដោយសារ​បញ្ហា Covid-19 ខណៈ​ការប្រកួត​មាន​សរុប ២៤​ក្រុម​ចូលរួម និង​សរុប​ទាំងអស់ ៥១​ប្រកួត​នឹង​ចាប់ផ្ដើម​ពី​ថ្ងៃ​ទី​១១ ខែ​មិថុនា ដល់​ថ្ងៃ​ទី​១១ ខែ​កក្កដា​៕

​អត្ថបទ​៖​នាង សុភា​វុ​ធ