កំពង់ចាម៖ អំណោយមនុស្សធម៌ របស់សាខាកាកបាទក្រហមកម្ពុជា ខេត្តកំពង់ចាម បានផ្តល់ជូនប្រជាពលរដ្ឋងាយរងគ្រោះបំផុត និងខ្វះខាតជីវភាព នៅក្នុងស្រុកកោះសូទិន សរុបចំនួន ៨០គ្រួសារ។

ថ្លែងក្នុងពិធីផ្តល់អំណោយមនុស្សធម៌ របស់សាខាកាកបាទក្រហមកម្ពុជា ខេត្តកំពង់ចាម នៅថ្ងៃទី២៧ ខែមករា ម្សិលមិញនេះ ឯកឧត្តម អ៊ុន ចាន់ដា ប្រធានគណៈកម្មាធិការសាខា បានពាំនាំនូវប្រសាសន៍ផ្ដាំផ្ញើពីសំណាក់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ទោះបីសម្ដេច មិនបានអញ្ជើញមកដោយផ្ទាល់ តែសម្ដេច លោក​តែង​តែមានក្តីនឹករលឹក គិតគូរពីសុខទុក្ខជាប្រចាំ ចំពោះប្រជាពលរដ្ឋទាំងអស់ ពិសេស​ប្រជាពលរដ្ឋ​រងគ្រោះ និងងាយរងគ្រោះ ហើយតែងបានចាត់តំណាង ចុះអន្តរាគមន៍ នាំយកនូវអំណោយ​សង្រ្គោះបន្ទាន់ ផ្ដល់ជូនទាន់ពេលវេលា ដោយមិនរើសអើង មិនប្រកាន់វណ្ណៈ តាមទិសស្លោក «ទីណាមានទុក្ខលំបាក ទីនោះមានកាកបាទក្រហមកម្ពុជា» និង«មិនទុកនរណាម្នាក់ចោល» ។

ឯកឧត្តមប្រធានគណៈកម្មាធិការសាខា បានក្រើនរំលឹក ដល់លោកតា លោកយាយ បងប្អូន ប្រជាពលរដ្ឋ ដែលចូលរួមទាំងអស់ សូមលើកកម្ពស់ការថែទាំសុខភាព ឲ្យបានល្អ ដោយរស់នៅ ត្រូវមានអនាម័យ ជាពិសេស ក្នុងស្ថានភាពដែលអាកាសធាតុមានការប្រែប្រួល ក្តៅ-ត្រជាក់ នេះ អាចនឹងបង្កឱ្យកើតមានជម្ងឺដង្កាត់ផ្សេងៗ ។

ទន្ទឹមនេះ សូមបន្តយកចិត្តទុកដាក់ អនុវត្តឲ្យបានខ្ជាប់ខ្ជួន វិធានសុខាភិបាល «៣ការពារ ៣កុំ» និងអញ្ជើញទៅទទួលយកការចាក់វ៉ាក់សាំង ដូសជំរុញ ឱ្យបានគ្រប់ៗគ្នា ដើម្បីបង្កភាពស៊ាំ​សហគមន៍ ទប់ស្កាត់ការឆ្លងរាលដាលកូវីដ-១៩ ។ ម៉្យាងវិញទៀតក៏សូមបង្កើន ការប្រុងប្រយ័ត្នខ្ពស់ ផងដែរ ចំពោះគ្រោះមហន្តរាយផ្សេងៗ ដែលអាចកើតមាន ពិសេសគ្រោះអគ្គីភ័យ អាចបណ្តាល​ឱ្យបាត់បង់ទ្រព្យសម្បត្តិ និងលំនៅដ្ឋាន ប្រសិនបើមានការធ្វេសប្រហែសនោះ ៕