ភ្នំពេញ៖ គណបក្សប្រជាជនកម្ពុជា នៅព្រឹកថ្ងៃទី២៨ ខែមករា បានបើកមហាសន្និបាតវិសាមញ្ញតំណាង​ទូទាំង​ប្រទេស រយៈពេល២ថ្ងៃ គឺពីថ្ងៃទី២៨ ដល់ថ្ងៃទី២៩ ខែមករា នៅវិមាន៧មករា រាជធានីភ្នំពេញ ក្រោមអធិបតីភាពសម្តេចអគ្គមហាសេនាបតីតេជោ ហ៊ុន សែន ប្រធានគណបក្សប្រជាជនកម្ពុជា និងសម្តេចអគ្គមហាពញាចក្រី ហេង សំរិន ប្រធានកិត្តិយសគណបក្សប្រជាជនកម្ពុជា ។

ក្នុងអង្គសន្និបាតមានសមាជិក សមាជិកាគណៈកម្មាធិការកណ្តាល បន្ថែមដោយសមាជិក សមាជិកា រដ្ឋសភា ព្រឹទ្ធសភា រាជរដ្ឋាភិបាល មន្ត្រីជាន់ខ្ពស់មួយចំនួននៅតាមក្រសួង ស្ថាប័ន រាជធានី ខេត្ត ក្រុង ស្រុក ខណ្ឌ ថ្នាក់ដឹកនាំនៃក្រុមការងារថ្នាក់កណ្តាល ចុះជួយរាជធានី-ខេត្ត និងថ្នាក់ដឹកនាំនៃអង្គការមហាជនរបស់គណបក្សចូលរួម សរុបចំនួន ៣៥៥៨រូប ។

ថ្លែងក្នុងឱកាសបើកមហាសន្និបាតសម្តេចពញាចក្រី ហេង សំរិន មានប្រសាសន៍ថា យើងជួបជុំគ្នា​ប្រារព្ធធ្វើមហាសន្និបាតវិសាមញ្ញតំណាងទូទាំងប្រទេសរបស់គណបក្ស នៅក្នុងអាគ៌ា​វិមាន៧មករា នៃទីស្នាក់ការកណ្តាលគណបក្ស ដើម្បីពិនិត្យវាយតម្លៃលើការងារ​សំខាន់ៗ និងកំណត់ដាក់ចេញនូវ​ទិសដៅការងារដែលមានចរិតជាយុទ្ធសាស្ត្រសម្រាប់ការអនុវត្តបន្តទៀត។

សម្ដេចថា ចាប់ពីឆ្នាំ២០១៨ មកតាមរយៈលទ្ធផលនៃការបោះឆ្នោតជ្រើសតាំងតំណាងរាស្ត្រ នីតិកាលទី៦ ឆ្នាំ២០១៨ បានផ្តល់លទ្ធភាពឱ្យគណបក្សយើងកាន់អំណាចទាំងស្រុង ទាំងនៅថ្នាក់​ជាតិ និង ទាំងនៅថ្នាក់ក្រោមជាតិ នៅក្នុងបរិបទនៃលទ្ធិប្រជាធិបតេយ្យសេរីពហុបក្ស ។ នៅក្នុងនីតិកាលទី៦ នៃរដ្ឋសភានេះ ទាំងស្ថាប័ននីតិបញ្ញត្តិ និងទាំងស្ថាប័ននីតិប្រតិបត្តិ បានសាម​គ្គីគ្នា​ពុះពារគ្រប់ឧបសគ្គ ខិតខំធ្វើការងារមិនសំចៃកម្លាំង ហើយបាននាំមកនូវជោគជ័យ និងសមិទ្ធផល​ធំធេងលើគ្រប់វិស័យជូនជាតិ និងប្រជាជន ក្នុងនោះលេចធ្លោ គឺការរក្សាបានសន្តិភាព ឯករាជ្យ អធិបតេយ្យ បូរណភាពទឹកដីនៅគ្រប់កន្លែង ការរក្សាបានស្ថិរភាពនយោបាយ សន្តិសុខ សុវត្ថិភាពសង្គមរឹងមាំ ការគ្រប់គ្រងជំងឺកូវីដ-១៩ បានល្អប្រសើរ ការរក្សាបានកំណើនសេដ្ឋកិច្ចនិង លំនឹងជីវភាពរបស់ប្រជាជន ការកែទម្រង់រដ្ឋគ្រប់វិស័យទទួលបានលទ្ធផលជាផ្លែផ្កា ការទទួលបាន ជោគជ័យលើការងារបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី៥ ឆ្នាំ២០២២ ការលើក កម្ពស់កិត្តិសព្ទរបស់កម្ពុជាកម្រិតខ្ពស់នៅលើឆាកតំបន់ និងអន្តរជាតិ តាមរយៈជោគ ជ័យនៃការ​អនុវត្ត​នយោបាយការបរទេសឯករាជ្យដោយផ្អែកលើច្បាប់ និងជោគជ័យនៃការដឹកនាំនិងបំពេញ​ភារកិច្ច ជាប្រធានអាស៊ានឆ្នាំ២០២២ ក៏ដូចជាមហាសន្និបាតអន្តរសភាអាស៊ាន(AIPA) លើកទី៤៣ ដែល កម្ពុជាធ្វើជាម្ចាស់ផ្ទះ ជាដើម។

សម្ដេចពញាចក្រី ហេង សំរិន បានបន្តទៀតថា បើនិយាយពីភាពរឹងមាំរបស់គណបក្សប្រជាជន​កម្ពុជាវិញ មកដល់ពេលនេះយើងពង្រឹងពង្រីកបានធនធានមនុស្សសម្បូរបែប ជាពិសេសមាន​ធនធាន​សម្រាប់បន្តវេនតាម សម័យកាល យើងពង្រឹងរចនាសម្ព័ន្ធចាត់តាំងគ្រប់ថ្នាក់បានរឹងមាំ យើងពង្រឹងពង្រីកសមាជិកបក្ស ទូលំទូលាយដល់គ្រប់មជ្ឈដ្ឋានក្នុងសង្គម យើងមានកន្លែង​ធ្វើការដូចជា អាគ៌ាវិមាន៧មករា និងអាគា នៃទីស្នាក់ការគណបក្សគ្រប់ថ្នាក់ រឹងមាំ ស័ក្ដិសម សមរម្យ នៅទូទាំងប្រទេស ព្រមទាំងមាន មធ្យោបាយផ្សេងទៀតសម្រាប់ធ្វើការងារផងដែរ។ ទាំងអស់នេះ បញ្ចាក់ថា គណបក្សប្រជាជនកម្ពុជា គឺជាគណបក្សឈានមុខដែលមានឧត្តមភាពខ្ពស់​សម្រាប់ការប្រកួតប្រជែងក្នុងរបបប្រជាធិបតេយ្យសេរី ពហុបក្ស និងក៏ជាផែនគ្រឹះទ្រទ្រង់​ឱ្យកម្ពុជា​មានសុខសន្តិភាព និងការអភិវឌ្ឍវែងឆ្ងាយយូរអង្វែង។ អ្វីដែល យើងត្រូវយកចិត្តទុកដាក់នៅ​ពេលនេះ គឺឆ្នាំ២០២៣ ជាឆ្នាំដែលត្រូវបញ្ចប់អាណត្តិរដ្ឋសភា និងរាជរដ្ឋាភិបាល ឆ្នាំ២០១៨-២០២៣ និងក៏ជាឆ្នាំដែលត្រូវចាប់ផ្តើមនីតិកាលថ្មីរយៈពេល៥ឆ្នាំបន្តទៀត។

ប្រការនេះបញ្ជាក់ថា យើងពិតជាមានកិច្ចការច្រើនណាស់ ដែលត្រូវធ្វើនាពេលចំពោះមុខ ហើយ​ក្នុងនោះក៏ត្រូវរួមគ្នាធ្វើរាល់កិច្ចការឱ្យបានល្អបំផុតដើម្បីឈានទៅដណ្ដើមជ័យជម្នះក្នុងការបោះឆ្នោត ជ្រើសតាំងតំណាងរាស្ត្រ នីតិកាលទី៧ នាថ្ងៃទី២៣ ខែកក្កដា ឆ្នាំ២០២៣ នាពេលខាងមុខ ៕