ភ្នំពេញ៖ សម្ដេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រី ក្រសួងការពារជាតិ បានថ្លែងថា កិច្ចទំនាក់ទំនងការពង្រឹង និងពង្រីកចំណងមិត្តភាព និងកិច្ចសហប្រតិបត្តិការទ្វេភាគី កម្ពុជា-ថៃកន្លងមក ក្នុងក្របខណ្ឌការពារជាតិ គឺកាន់តែប្រសើរឡើងជាលំដាប់។

សម្ដេចថ្លែងបែបនេះ ក្នុងឱកាសជំនួបជាមួយ ឯកឧត្តម ជេតគៀត អាថាគ័រ ឯកអគ្គរាជទូតថៃ ប្រចាំកម្ពុជាចូលជួបសម្តែងការគួរសម នៅទីស្តីការក្រសួងការពារជាតិ នារសៀលថ្ងៃទី២៧ ខែមករា ឆ្នាំ២០២៣។

សម្ដេចពិជ័យេសេនា ទៀ បាញ់ បានសម្តែងការស្វាគមន៍ ចំពោះឯកឧត្តម ឯកឧត្តម ជេតគៀត អាថាគ័រ ឯកអគ្គរាជទូតថៃ ប្រចាំកម្ពុជា ដែលបានចូលជួបសំដែងការគួរសមនៅពេលដែល ឯកឧត្តម ត្រូវបានទទួលការតែងតាំងជាឯកអគ្គរាជទូតថៃថ្មី។

សម្ដេចពិជ័យេសេនា ក៏បានលើកថាកិច្ចទំនាក់ទំនងការពង្រឹង និងពង្រីកចំណងមិត្តភាព និងកិច្ចសហប្រតិបត្តិការទ្វេភាគី កម្ពុជា-ថៃកន្លងមក ក្នុងក្របខណ្ឌការពារជាតិ គឺកាន់តែប្រសើរ ឡើងជាលំដាប់។

ពិសេសពង្រឹងកិច្ចសហប្រតិបត្តិការ ទំនាក់ទំនងនៅតាមបណ្តោយព្រំដែននៃប្រទេសទាំង២ ទាំងព្រំដែនគោក និងព្រំដែនទឹកបានល្អនាពេលកន្លងមក។

សម្ដេចថ្លែងថាជាក់ស្តែងនៅក្នុងឆ្នាំ២០២២កន្លងមក ទោះបីមានការរីករាលដាលជំងឺកូវីដ-១៩ ជាសកលយ៉ាងណាក្ដី ប៉ុន្តែ រដ្ឋាភិបាលក្រសួងការពារជាតិប្រទេសយើងទាំង២ នៅតែពង្រឹងកិច្ចសហប្រតិបត្តិការជាមួយគ្នាតាមរយៈការផ្ដល់សម្ភារៈ និងបរិក្ខារពេទ្យគាំទ្រយុទ្ធនាការជំងឺកូដ-១៩ ដល់កងយោធពលខេមរភូមិន្ទនិងមានការផ្លាស់ប្តូរដំណើរទស្សនកិច្ចរវាងយោធាទាំង២។

សម្ដេចពិជ័យសេនា ទៀ បាញ់ ក៏បានថ្លែងអំណរគុណដល់រាជរដ្ឋាភិបាល និងកងទ័ពភូមិន្ទថៃ ដែលកន្លងមកបានជួយបណ្តុះបណ្តាលធនធានមនុស្សក្នុងជួរ ខ.ភ.ម លើវិស័យបច្ចេកទេសនានា ក៏ដូចជាវិស័យអភិវឌ្ឍកសិកម្មផងដែរ។

ជាកិច្ចឆ្លើយតបឯកឧត្តម ជេតគៀត អាថាគ័រ ឯកអគ្គរាជទូតថៃ ប្រចាំព្រះរាជាណាចក្រកម្ពុជា បានលើកឡើងនូវកិច្ចសហប្រតិបត្តិការ រវាងកងទ័ពកម្ពុជានិងថៃ នៅតែបន្តពង្រឹងនិងពង្រីកឲ្យបាន គឺកាន់ប្រសើរឡើងថែមទៀត។

ឯកឧត្តម បានបន្តថា ការមកទទួលភារកិច្ចការទូតថ្មីនៅកម្ពុជា ឯកឧត្តម និងខិតខំអនុវត្តបន្តឲ្យកាន់តែប្រសើរឡើងនូវទំនាក់ទំនងកិច្ចសហប្រតិបត្តិការរវាងប្រទេសយើងទាំង២កងទ័ពទាំង ២ កាន់តែ រឹងមាំថែមទៀត។

ឯកឧត្តម ក៏បានសំដែងនូវអំណរសាទរចំពោះលទ្ធលជោគជ័យដ៏ត្រចះត្រចង់ នៃកិច្ចប្រជុំកំពូលអាស៊ានដែលឆ្នាំនេះកម្ពុជាទទួលធ្វើជាម្ចាស់ផ្ទះ ដោយឡែកកិច្ចប្រជុំចង្អៀតរដ្ឋមន្ត្រីការពារជាតិអាស៊ាន (ADMM Retreat) និងកិច្ចប្រជុំរដ្ឋមន្ត្រីការពារជាតិអាស៊ានបូកលើកទី ៩(9 ADMM-Plus) ដែលសម្តេចពិជ័យ បានធ្វើជាប្រធាននៃកិច្ចប្រជុំកន្លងមក។ ឯកឧត្តម ឯកអគ្គរាជទូតថៃ ក៏បានថ្លែងអំណរគុណដល់សម្តេចពិជ័យសេនា ដែលសម្តេចតែងតែមានវត្តមានជាប្រចាំក្នុងកិច្ចប្រជុំនានាទាក់ទងទៅនឹងកិច្ចសហប្រតិបត្តិការ នៃប្រទេសទាំង២៕