ភ្នំពេញ៖ សម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ និងជាប្រធាន​គណៈកម្មាធិការជាតិសុវត្ថិភាពចរាចរណ៍ផ្លូវគោក (គ.ស.ច.គ) បានណែនាំដល់ស្ថាប័នពាក់ព័ន្ធ សិក្សាស្រាវជ្រាវច្បាប់មួយ ​ដើម្បីដាក់បន្ទុកដល់ជនបង្កគ្រោះថ្នាក់ចរាចរណ៍លើអនីតិជន ឱ្យទទួល​ខុសត្រូវ​ចិញ្ចឹមបីបាច់រក្សារហូតដល់ អាយុ ១៨ឆ្នាំ ។

ក្នុងឱកាសអញ្ជើញដឹកនាំកិច្ចប្រជុំបូកសរុបលទ្ធផលការងារសុវត្ថិភាពចរាចរណ៍ផ្លូវគោក ​ប្រចាំឆ្នាំ ២០២២ ​និងលើកទិសដៅការងារឆ្នាំ២០២៣ ​នៅព្រឹកថ្ងៃទី៣០ ខែមករានេះ សម្ដេចក្រឡាហោម មានប្រសាសន៍ថា ​គ្រោះថ្នាក់ចរាចរណ៍ ​ដោយសារអ្នកប្រើប្រាស់ផ្លូវមួយចំនួន មិនគោរព​ប្រតិបត្តិ​ច្បាប់ ខ្វះសីលធម៌ ​ខ្វះការយោគយល់អធ្យាស្រ័យ ហាក់បីដូចជាមិនស្រឡាញ់អាយុជីវិត​ខ្លួនឯង និងជីវិតអ្នកដទៃ ។

សម្ដេចក្រឡាហោម ចង់ឱ្យមានការទទួលខុសត្រូវរបស់អ្នកបង្កគ្រោះថ្នាក់លើអនីតិជន​ ដោយបាន លើកយកករណីនៃការបង្កគ្រោះថ្នាក់លើអនីតិជននៅឯណាបរទេស ដែលអ្នកបង្កត្រូវទទួល​ខុស​ត្រូវចិញ្ចឹម បីបាច់ថែរក្សារហូតដល់អាយុ១៨ឆ្នាំ ដើម្បីជាការដាស់តឿនដល់អ្នកបើកបរឱ្យ​មានការ​ប្រុងប្រយ័ត្នខ្ពស់ ។

សម្ដេចក្រឡាហម បានបន្ថែមថា ស្ថានភាពគ្រោះថ្នាក់ចរាចរណ៍ផ្លូវគោក ក្នុងឆ្នាំ២០២២ បាន តម្រូវ​ឱ្យធ្វើការត្រួតពិនិត្យឡើងវិញនូវចំណុចវិជ្ជមាន ​និងអវិជ្ជមាន​ ដើម្បីដកពិសោធន៍ និងដោះស្រាយ បញ្ហា​ប្រឈមឲ្យបានទាន់ពេលវេលា ​សំដៅកែលម្អ និងបង្កើនប្រសិទ្ធផលការងារសុវត្ថិភាព​ចរាចរណ៍​ផ្លូវ គោក ក្នុងឆ្នាំ២០២៣ ៕អត្ថបទ៖ បាន សុខរិទ្ធិ