បាត់ដំបង ៖ ឯកឧត្តម ប៊ុន ហុន រដ្ឋលេខាធិការក្រសួងមហាផ្ទៃ និងជាប្រធានក្រុមការងារ ចុះជួយស្រុកគាស់ក្រឡ ខេត្តបាត់ដំបង នៅថ្ងៃទី២៤–២៥ ខែតុលានេះ បានដឹកនាំមន្ត្រី និងក្រុមការងារចុះជួយស្រុកគាស់ក្រឡ ផ្តួចផ្តើមធ្វើបុណ្យកឋិនទានសាមគ្គី ទៅកាន់វត្តព្រះផុស ស្ថិតនៅឃុំព្រះផុស ស្រុកគាស់ក្រឡ ខេត្តបាត់ដំបង។
អង្គកឋិនទានតាមបែបព្រះពុទ្ធសាសនានេះគឺបានផ្តួចផ្តើមឡើង ដោយឯកឧត្តម ប៊ុន ហុន រដ្ឋលេខាធិការក្រសួងមហាផ្ទៃ ឯកឧត្តមឡាំ ជា រដ្ឋលេខាធិការក្រសួងមហាផ្ទៃ និងឯកឧត្តម ស្រេង វង្សហៀង ទីប្រឹក្សាសម្តេចក្រឡាហោម ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ និងក្រុមការងារចុះជួយស្រុកគាស់ក្រឡ រួមទាំងពុទ្ធបរិស័ទទីជិតទីឆ្ងាយនៃវត្តព្រះផុសនេះជាដើម។
ឯកឧត្តម ស្រេង វង្សហៀង ទីប្រឹក្សាសម្តេចក្រឡាហោម ស ខេង និង លោកជំទាវ សុត សុវណ្ណដា តំណាងឯកឧត្តម ប៊ុន ហុន បានចូលរួមដង្ហែរអង្គកឋិនទាននេះ បានលើកឡើងថា ការធ្វើកឋិនទានសាមគ្គីនេះ គឺធ្វើឡើង ដើម្បីប្រមូលបច្ច័យសាងសង់សមិទ្ធផលនានានៅវត្តនេះ ខណៈវត្តកំពុងមានការខ្វះខាត ហើយក៏ដើម្បីឧទ្ទិសកុសលផលបុណ្យថ្វាយ និងជូនដល់បុព្វបុរសខ្មែរយើង ដែលបានបូជាសាច់ស្រស់ ឈាមស្រស់ដើម្បីបុព្វហេតុជាតិ មាតុភូមិ រហូតដល់មានសុខសន្តិភាព និងការអភិវឌ្ឍរហូតដល់សព្វថ្ងៃនេះជាដើម៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
