ភ្នំពេញ៖ ជារៀងរាល់ខែ រាជរដ្ឋាភិបាលកម្ពុជា បានបើកថវិកាជូនអតីតយុទ្ធជន គ្រួសារអតីតយុទ្ធជន ក៏ដូចជានិវត្តជន និងជនបាត់បង់សម្បទាវិជ្ជាជីវៈ ដែលជាអតីតមន្រ្តីរាជការស៊ីវិល ក្នុងរង្វង់ ៣០លាន​ដុល្លារ។ នេះជាការបញ្ជាក់របស់ ប្រតិភូរាជរដ្ឋាភិបាលទទួលបន្ទុកជាអគ្គនាយក មូលនិធិជាតិ​ជំនួយសង្គម។

បច្ចុប្បន្នរាជរដ្ឋាភិបាលកម្ពុជា ​គឺបន្តការយកចិត្តទុកដាក់ជាខ្លាំងទៅលើជនចូលនិវត្ត​ទាំងមន្រ្តីរាជការ​ស៊ីវិល ​ទាំងអតីតយុទ្ធជនដែលបានលះបង់ពលី ដើម្បីជាតិនាគ្រាអតីតកាល។ ការយកចិត្ត​ទុក​ដាក់​ធ្វើឡើងតាមរយៈ ការធានានូវកម្រិតជីវភាពរបស់ក្រុមគោលដៅទាំងពីរ​មិនឱ្យធ្លាក់ចូលភាព​លំបាក។

រាជរដ្ឋាភិបាលកម្ពុជា បើកផ្ដល់សាច់ប្រាក់ជូន អតីតយុទ្ធជន គ្រួសារអតីតយុទ្ធជន ក៏ដូចជានិវត្តជន និងជនបាត់បង់សម្បទាវិជ្ជាជីវៈ ដែលជាអតីតមន្រ្តីរាជការស៊ីវិល ចំនួន២ដងក្នុងមួយខែ។ នេះជាការលើកឡើងរបស់ឯកឧត្តម ឈួរ សុបញ្ញា ប្រតិភូរាជរដ្ឋាភិបាលទទួលបន្ទុកជាអគ្គនាយក មូលនិធិជាតិជំនួយសង្គម ។

ឯកឧត្តមបន្តថា ការបើកសាច់ប្រាក់ក្នុងពេលបច្ចុប្បន្ន គឺមានមន្រ្តីរាជការស៊ីវិលចូលនិវត្ត​ក្នុង​រង្វង់ជិត ៦ម៉ឺននាក់ ​និងអតីតយុទ្ធជនក្នុងរង្វង់ ៥ទៅ៦ម៉ឺននាក់ផងដែរ។ ​ជាប្រចាំខែ គឺរាជរដ្ឋាភិបាលកម្ពុជា​ចំណាយ​ថវិកាប្រមាណ ៣០លានដុល្លារក្នុងមួយខែ។ ​សាច់ប្រាក់ទទួលបាន គឺមានភាពផ្សេងគ្នា ហើយការ​ទទួលបានសាច់ប្រាក់ប្រចាំខែនេះ ​គឺតិចបំផុត ៦០ភាគរយនៃប្រាក់បៀវត្សប្រចាំខែ អំឡុងពេលពួកគាត់​នៅបំពេញការងារ មុនចូលនិវត្តន៍។

ក្រុមគោលដៅទាំងពីរ ទាំងអតីតយុទ្ធជន និងមន្រ្តីរាជការស៊ីវិល ក៏នឹងបើកសាច់ប្រាក់លើកទី២ ប្រចាំខែមករា ឆ្នាំ ២០២៣ នៅថ្ងៃទី៣១ ​ខែមករាផងដែរ។ ​សម្រាប់រាជធានីភ្នំពេញ គឺទៅ​បើកសាច់​ប្រាក់នៅ ធនាគារកាណាឌីយ៉ា រីឯតាមបណ្ដាខេត្តដទៃទៀត ​គឺទៅបើកសាច់ប្រាក់នៅ ធនាគារអេស៊ីលីដា។

ចំពោះមន្រ្តីចូលនិវត្តថ្មី គឺត្រូវមកបំពេញឯកសារជាមួយមន្រ្តីជំនាញនៅក្រសួងសង្គមកិច្ច អតីតយុទ្ធ​ជន និងយុវនីតិសម្បទា។ ជាក់ស្ដែងនៅថ្ងៃនេះ​ ក៏មានមន្រ្តីនគរបាលចូលនិវត្តមួយ​ចំនួនមកពីខេត្ត ប៉ៃលិនផងដែរ ​បានមកបំពេញលក្ខខណ្ឌតម្រូវនេះផងដែរ។ ពួកគេពិតជាសប្បាយចិត្ត និងមើល​ឃើញថា នេះជាការយកចិត្តទុកដាក់ជាខ្លាំង ពីប្រមុខរាជរដ្ឋាភិបាលកម្ពុជា។

តាមការបញ្ជាក់របស់ប្រតិភូរាជរដ្ឋាភិបាលទទួលបន្ទុកជាអគ្គនាយក មូលនិធិជាតិជំនួយសង្គម បច្ចុប្បន្នក្រុមការងារ​ជំនាញ ​ក៏កំពុងគិតគូរពីការផ្តល់អត្ថប្រយោជន៍បន្ថែមជូនក្រុម​គោលដៅ​ទាំងពីរ​ផងដែរ។ អត្ថប្រយោជន៍ទាំងនេះរួមមាន ​ប្រព័ន្ធកម្ចីក្នុងអត្រាការប្រាក់ទាប ដោយមិនទាមទារ​ទ្រព្យបញ្ចាំ និងការសហការជាមួយវិស័យឯកជន ក្នុងការបញ្ចុះតម្លៃនានាជាដើម៕អត្ថបទ៖ គឹមហុក