​អាមេរិក៖ រដ្ឋមន្ត្រីការបរទេស​សហរដ្ឋអាមេរិក​លោក Antony Blinken បានធ្វើ​ដំណើរ​ទៅដល់​មជ្ឈិម​បូព៌ា​កាលពី​ថ្ងៃអាទិត្យ ដោយ​ចាប់ផ្តើម​ដំណើរ​ទស្សនកិច្ច​រយៈពេល​ ៣​ថ្ងៃ ខណៈ​អំពើ​ហិង្សា​ផ្ទុះឡើង​រវាង​អ៊ី​ស្រាអែល និង​ប៉ា​ឡេ​ស្ទី​ន និង​ជាមួយ​ប្រទេស​អ៊ីរ៉ង់ និង​សង្គ្រាម​នៅ​អ៊ុយ​ក្រែ​ន​ស្ថិត​ក្នុង​របៀបវារៈ​។

បន្ទាប់ពី​ឈប់​ចត​នៅ​ទីក្រុង​គែរ ​(Cairo) លោក Blinken បានធ្វើ​ដំណើរ​ទៅកាន់​ទីក្រុង​ Jerusalem ​នៅ​ថ្ងៃ​ចន្ទ​នេះ ជា​កន្លែង​ដែល​រដ្ឋាភិបាល​ស្តាំ​និយម​ថ្មី​របស់​នាយករដ្ឋមន្ត្រី​លោក Benjamin Netanyahu បាន​ធ្វើ​ឱ្យ​មានការ​ព្រួយបារម្ភ​ទាំង​ក្នុង​ប្រទេស និង​នៅ​បរទេស​អំពី​អនាគត​របស់​អ៊ីស្រាអែល ទំនាក់​ទំនង​ជនជាតិភាគតិច និង​ការ​ជាប់​គាំង​កិច្ចចរចា​សន្តិភាព​ជាមួយ​ប៉ា​ឡេ​ស្ទី​ន​។ ​វា​ក៏​មាន​ការ​រីក​រាល​ដាល​អំពើ​ហិង្សា​ដ៏​ឃោរឃៅ​នៅ​ក្នុង​ប៉ុន្មាន​ថ្ងៃ​ថ្មីៗ​នេះ ដែល​បង្កើន​ការ​ព្រួយ​បារម្ភ​ថា អំពើ​ហិង្សា​ដែល​កំពុង​កើន​ឡើង​រួចហើយ​នឹង​កើន​ឡើង​បន្ថែម​ទៀត​។ ខ្មាន់កាំភ្លើង​ជនជាតិ​ប៉ា​ឡេ​ស្ទី​ន​ម្នាក់​បាន​សម្លាប់​មនុស្ស ៧​នាក់​ក្នុង​ការ​វាយប្រហារ​មួយ​នៅ​ខាងក្រៅ​សាលា​ប្រជុំ​ទីក្រុង ​Jerusalem ​កាលពី​ថ្ងៃ​សុក្រ​។ វា​គឺជា​ការវាយប្រហារ​ដ៏​អាក្រក់​បំផុត​លើ​ជនជាតិ​អ៊ីស្រាអែល​នៅក្នុង​តំបន់​ទីក្រុង​ Jerusalem ចាប់​តាំង​ពី​ឆ្នាំ​២០០៨ ​មក ហើយ​មានការ​វាយឆ្មក់​របស់​អ៊ីស្រាអែល​នៅ​ទីក្រុង Jenin ភាគ​ខាងលិច​។​

​នៅ​ក្នុង​កិច្ចពិភាក្សា​ជាមួយ​រដ្ឋបាល​អ៊ីស្រាអែល​ថ្មី ដែល​រួមមាន​គណបក្ស​ជាតិនិយម​ជ្រុល​ដែល​ចង់​ពង្រីក​ការ​តាំង​ទីលំនៅ​នៅ​តំបន់ ​West Bank លោក Blinken នឹង​ធ្វើ​ការ​អំពាវនាវ​ជាថ្មី​ម្តង​ទៀត​របស់​សហរដ្ឋអាមេរិក​ឱ្យ​មាន​ភាព​ស្ងប់ស្ងាត់ និង​បញ្ជាក់​ពី​ការ​គាំទ្រ​របស់​ទីក្រុង​វ៉ាស៊ីនតោន​ចំពោះ​ដំណោះ​ស្រាយ​រដ្ឋ​ពីរ ទោះបីជា​មន្ត្រី​សហរដ្ឋអាមេរិក​ទទួល​​ស្គាល់​ថា ការចរចា​សន្តិភាព​រយៈ​ពេល​វែង​គឺ មិន​ទំនងជា​កើតមាន​ក្នុង​ពេល​អនាគត​ដ៏​ខ្លី​ខាងមុខ​ក៏ដោយ​។ លោក Blinken ក៏​នឹង​ធ្វើ​ដំណើរ​ទៅកាន់​ទីក្រុង​ Ramallah ដើម្បី​ជួប​ជាមួយ​ប្រមុខ​អាជ្ញាធរ​ប៉ា​ឡេ​ស្ទី​ន​លោក Mahmoud Abbas មន្ត្រី​ប៉ា​ឡេ​ស្ទី​ន​ផ្សេង​ទៀត និង​សមាជិក​សង្គម​ស៊ីវិល​ផង​ដែរ៕

អត្ថបទ៖ ប៊ុនថន