ភ្នំពេញ៖ ឯកឧត្តម កិត្តិសង្គហបណ្ឌិត គន់ គីម ទេសរដ្ឋមន្ត្រី អនុប្រធានទី១គណៈកម្មាធិការ ជាតិគ្រប់គ្រងគ្រោះមហន្តរាយ បានអំពាវនាវប្រជាពលរដ្ឋ ត្រូវបង្កបង្កើនស្រូវប្រាំងឲ្យស្រប តាមស្ថានភាពធនធានទឹក ​ក្នុងតំបន់របស់ពួកគាត់ ចៀសវាងជួបគ្រោះរាំងស្ងួត​ ហើយបញ្ហានេះ អាជ្ញាធរមូលដ្ឋានត្រូវផ្សព្វផ្សាយឲ្យបានទូលំទូលាយ ។

ក្នុងកិច្ចប្រជុំលទ្ធផលការងារគ្រប់គ្រងគ្រោះមហន្តរាយ ក្នុងខែមករា និងទិសដៅបន្តខែ កុម្ភៈ ឆ្នាំ២០២៣ ​គណៈកម្មាធិការជាតិគ្រប់គ្រងគ្រោះមហន្តរាយ ​ឯកឧត្តមកិត្តិសង្គហបណ្ឌិត មាន​ប្រសាសន៍​ថា គណៈកម្មាធិការជាតិគ្រប់គ្រងគ្រោះមហន្តរាយ ​ក្នុងនាមថ្នាក់ជាតិជាអ្នក សម្របសម្រួល​ និងបន្តកិច្ចសហការជាមួយក្រសួងស្ថាប័នជំនាញ ​និងអាជ្ញាធរមូលដ្ឋាន ក្នុង ការប៉ាន់ប្រមាណ និងវាយតម្លៃការខូចខាត ​និងបាត់បង់ដោយទឹកជំនន់ ​និងការស្ដារឡើងវិញ ជាពិសេស​ក្នុងវិស័យកសិកម្ម និងហេដ្ឋារចនាសម្ព័ន្នជនបទដែលខូចខាត ។

ឯកឧត្តម បន្តថា មន្ត្រីជំនាញបានសម្របសម្រួល ជាមួយក្រសួងកសិកម្ម រុក្ខាប្រមាញ់ ​និងនេសាទ និងក្រសួងធនធានទឹក ​និងឧតុនិយម ចុះពិនិត្យ ​និងវាយតម្លៃការប៉ះពាល់ ​និងខូចខាត ដោយជំនន់​ទឹកភ្លៀង ក្នុងខែមករា​ ដើម្បីពិនិត្យលទ្ធផលក្នុងការឆ្លើយតប ​និងស្ដារឡើងវិញ និងសូមជំរុញ​ឲ្យអាជ្ញាធរមូលដ្ឋានណែនាំ​ ដល់ប្រជាកសិករ ក្នុងការបង្កបង្កើនផលស្រូវ ប្រាំង ឲ្យសមស្របទៅ​តាម​ធនធានទឹក ដែលមាននៅមូលដ្ឋានរបស់ខ្លួន ។

គួរបញ្ជាក់ថា ចុងឆ្នាំ២០២២ មូលដ្ឋានរងគ្រោះនៅក្នុងខេត្តចំនួន៥ រួមមាន៖ ខេត្តកំពង់ធំ ពោធិ៍សាត់ បន្ទាយមានជ័យ ស្វាយរៀង ​និងខេត្តព្រៃវែង នៅក្នុងស្រុក ​ក្រុងចំនួន១០ ឃុំសង្កាត់ចំនួន៣៧ ផ្ទៃដី​កំពុង​អន្តរាគមន៍​សង្គ្រោះចំនួន ៤១ ៥១៧ហិកតា​ ដំណាំរួមផ្សំប៉ះពាល់ ៦១៧ ហិកតា​ និងខូចខាត ៤៤៤ ហិកតានិងលំនៅដ្ឋានជន់លិច ៤ ៥៦៧ខ្នង និងខូចខាតទាំងស្រុង ១២ខ្នង និងរុះរើ ៧១ខ្នង ៕ អត្ថបទ៖ បាន សុខរិទ្ធិ