ភ្នំពេញ៖ នៅថ្ងៃទី៣០ខែមករានេះ លោកជំទាវ ហ៊ុន ដានី រដ្ឋលេខាធិការក្រសួងទេសចរណ៍ បានបើកកិច្ចប្រជុំស្តីពីការគ្រប់គ្រងអាជីវកម្ម ​និងបុគ្គលិកបំរើការសេដ្ឋកិច្ចក្រៅប្រព័ន្ធ ក្នុងវិស័យ​ទេសចរណ៍ នៅទីស្តីក្រសួង ក្នុងគោលបំណង ជំរុញអាជីវកម្មទេសចរណ៍ ​និងផ្តល់សិទ្ធស្មើគ្នា ផ្តល់អត្ថប្រយោជន៍ដូចគ្នា ​ជូនបុគ្គលិកបំរើការងារសេដ្ឋកិច្ចក្រៅប្រព័ន្ធ។

លោកជំទាវ ហ៊ុន ដានី ថ្លែងថា នៅអំឡុងពេលស្ថានការកូវីដ១៩ កំពុងធូរស្រាលវិញនេះ សំគាល់​ឃើញថា គ្រប់អាជីវកម្មទេសចរណ៍ជាពិសេសអាជីវកម្មមណ្ឌលកម្សាន្តមនុស្សពេញវ័យ អាជីវកម្ម​ម៉ាស្សា ស្បាត ខារាអូខេ ឌីស្កូតែក ក្លឹបរង្គសាល ​ភោជនីយដ្ឋាន ​និងបៀហ្គាឌិនជាដើម ភាគច្រើនគឺ​មានបុគ្គលិកគ្មានកិច្ចសន្យាជាមួយបណ្តាអាជីវកម្មចូលបំរើការងារ ក្នុងនោះ ភាគច្រើនជាស្ត្រី។

លោកជំទាវ ហ៊ុន ដានី បន្តថា នៅក្នុងកិច្ចប្រជុំនេះ គឺយើងរួមគ្នាពិភាក្សាជំរុញអាជីវកម្មទេសចរណ៍​ពង្រឹងការ​គ្រប់គ្រង​ បុគ្គលិកបំរើការគ្មានកិច្ចសន្យា ឬហៅថា​ បុគ្គលិកបំរើការសេដ្ឋកិច្ចក្រៅប្រព័ន្ធ ឲ្យបានច្បាស់លាស់ ដើម្បីផ្តល់ភាពងាយស្រួលដល់រាជរដ្ឋាភិបាលរៀបចំ​គោលនយោបាយ​គាំពារផ្នែកសង្គម និង ​លើកស្ទួយផ្តល់សិទ្ធការងារស្មើគ្នានឹងអ្នកបំរើការងារសេដ្ឋកិច្ចប្រព័ន្ធ។

លោកជំទាវ ហ៊ុន ដានី ក៏បានលើកឡើងដែរថា ​បច្ចុប្បន្នរាជរដ្ឋាភិបាល បាននិងកំពុងគិតគូរៀបចំ​ផ្តល់មេធាវីការពារផ្នែកច្បាប់​ជូនបុគ្គលិកបំរើការសេដ្ឋកិច្ចក្រៅប្រព័ន្ធ ​ជាពិសេសផ្តល់មេធាវីជូនស្ត្រី​ដែលងាយរងអំពើហឹង្សា​ពេលកំពុងបំរើការងារនានា និងជំរុញឲ្យប្រែក្លាយឲ្យទៅបំរើការងារ​នៅក្នុង​ប្រព័ន្ធ ដើម្បីទទួលបានអត្ថប្រយោជន៍នានាពីរាជរដ្ឋាភិបាល។

តាមរបាយការណ៍ លោក សុខ វណ្ណា ប្រធាននាយកដ្ឋានគ្រប់គ្រងសេវាកម្សាន្ត និងកីឡា​ទេសចរណ៍ បានឲ្យដឹងថា ​មកដល់បច្ចុប្បន្នអាជីវកម្មក្លឹបកម្សាន្ត ​ខារ៉ាអូខេ រង្គសាល ឌីស្កូតែក និងបៀហ្គាឌិន ​មានចំនួន៩២៨អាជីវកម្ម ​មានបុគ្គលិកបំរើការងារប្រមាណជាង ២៤០០០នាក់ ក្នុងនោះមាន​បុគ្គលិកបំរើការងារក្រៅប្រព័ន្ធមានប្រមាណជាង ​១៦៥០០នាក់ ក្នុងនោះនារីមានជិត ១ម៉ឺននាក់។

ដោយឡែកសម្រាប់អាជីវកម្មម៉ាស្សា ស្ប៉ាវិញ ទូទាំងប្រទេសមានចំនួន៤៦០អាជីវកម្ម មានបុគ្គលិក​បំរើការងារ ៣៧៤៥នាក់​ ហើយភាគច្រើនលើសលប់ជាបុគ្គលិកបំរើការគ្មានកិច្ចសន្យា ឬបំរើការងារសេដ្ឋកិច្ចក្រៅប្រព័ន្ធ៕អត្ថបទ ស៊ុម សុខជា