បន្ទាយមានជ័យ​ ៖ នៅថ្ងៃទី៣០ ខែមករា ឆ្នាំ២០២៣ ឧត្តមសេនីយ៍ត្រី សឹង្ហ ទុំ មេបញ្ជាការកង​ពល​តូចថ្មើរជើងលេខ៥១ បានដឹកនាំ នាយទាហានចំណុះ​ទីបញ្ជាការកងពល​ចុះធ្វើទស្សន​កិច្ច​សិក្សា​ការងារ​កសាងពង្រឹងអង្គភាពរឹងមាំ​លើ​គ្រប់វិស័យ អង្គភាពវរសេនាតូចថ្មើរជើងលេខ៥១៤ ស្ថិតនៅ​ទីបញ្ជាការ វរសេនាតូច ភូមិថ្មដែកកេះ ឃុំបន្ទាយឆ្មា​ស្រុកថ្មពួក ខេត្តបន្ទាយមានជ័យ។

ឧត្តមសេនីយត្រី សឹង្ហ ទុំ បានអញ្ជើញទស្សនាតាមខ្លឹមសារនីមួយៗ និងបាន​ថ្លែងកោត​សរសើរ​ដល់អង្គភាព ដែល​បាន​ខិតខំយកចិត្តទុកដាក់អនុវត្តតាមផែនការដែលថ្នាក់លើប្រគល់ជូន និង​អនុវត្តតួនាទីភារកិច្ច ប្រកបដោយ​ការទទួល​ខុសត្រូវខ្ពស់ តាមផែនការ កសាងអង្គភាពរឹង​មាំលើ​គ្រប់វិស័យ។

ក្នុងនោះដែរ ឧត្តមសេនីយត្រី សឹង្ហ ទុំ បានដាក់ផែនការ​ឱ្យគ្រប់អង្គភាព​បន្តខិតខំការងារ​កសាង​ហេដ្ឋារចនាសម្ព័ន្ធ ការងារ​បង្កបង្កើនផល និងចិញ្ចឹមសត្វ បន្ថែមលើគោលរបបហូបប្រចាំថ្ងៃ ក៏ដូចជាគ្រួសារយោធិនជួបការលំបាក និងមួយ​ចំនួន​លើសតម្រូវការ លក់ទៅទីផ្សារ សន្សំថវិកា កសាងក្នុងអង្គភាពនីមួយៗឲ្យកាន់តែល្អប្រសើរ។

ឧត្តមសេនីយ៍ត្រី ថ្លែងថា ក្រៅពីនោះត្រូវបន្តតាមដានយកចិត្តទុកដាក់ ពង្រឹងកម្លាំងត្រៀមអន្តរាគមន៍ ទាំងកម្លាំង មធ្យោបាយ​សម្ភារ ឲ្យបានជាប់ជាប្រចាំ ដើម្បីធានាបាននូវការជួយសង្រ្គោះ ប្រជាពលរដ្ឋ រងគ្រោះដោយ​បាតុភូតធម្មជាតិ​ផ្សេងៗបានទាន់ពេលវេលា និងរាយការណ៍​តាម​ឋាននុក្រម ចុះជួយភ្លាមៗ មិនថាយប់ឬថ្ងៃធានា​បាននូវការជួយ​សង្គ្រោះ​បាន​ទាន់ពេលវលា ជាពិសេស​ត្រូវបន្តអនុវត្តវិធានការ ៣កុំ ៣ការពារ និងវិធានការសុខាភិបាល ដើម្បីការពារការ​ឆ្លងរីករាលដាល​ជំងឺកូវីដ១៩ ចូលក្នុងអង្គភាព និងសហគមន៍៕​ដោយ ៖ ឧត្ដម