បន្ទាយមានជ័យ ៖​ នៅថ្ងៃទី៣០ ខែមករា ឆ្នាំ២០២៣ មាន​ក្រុម​គ្រូពេទ្យ​ស្ម័គ្រចិត្ត​ខ្មែរ-អាម៉េរិក សរុប​ប្រមាណ២០០នាក់ ​បាន​ចុះ​ពិនិត្យ​សុខភាព​ជូន​ប្រជាពលរដ្ឋ​ដោយ​ឥតគិត​ថ្លៃ​ ក្នុង​ឃុំ​ឬស្សីក្រោក ស្រុក​មង្គលបុរី។

ក្នុង​ពេល​ពិនិត្យ​សុខភាព​ជូនប្រជាពលរដ្ឋ ឯកឧត្តម អ៊ុ រាត្រី អភិបាលខេត្តបន្ទាយមានជ័យ បាន​ចុះ​ពិនិត្យ ​និង​សំណេះសំណាល​ជា​មួយ​ប្រជាពលរដ្ឋ ​ក្នុង​កម្មវិធី​ពិនិត្យ​ព្យាបាល និងផ្តល់​វ៉ែនតា​ជូន​ពួក​គាត់​ដោយ​ឥតគិតថ្លៃ តាម​រយៈ​ក្រុម​គ្រូពេទ្យស្ម័គ្រចិត្តនៃសមាគមសុខាភិបាលខ្មែរ-អាម៉េរិក សរុប​ប្រមាណ២០០នាក់ ចាប់ពីថ្ងៃ៣០ ខែមករា ដល់ថ្ងៃទី០៤ ខែកុម្ភៈ ឆ្នាំ២០២៣ ស្ថិតនៅ​សាលាបឋម​សិក្សាឬស្សីក្រោក។

ក្នុងឱកាសនោះ ឯកឧត្តម អ៊ុ រាត្រី អភិបាលខេត្ត បានថ្លែង​អំណរគុណ​យ៉ាងជ្រាលជៅ​ដល់​ក្រុម​គ្រូពេទ្យស្ម័គ្រ​ចិត្ត​នៃ​សមាគមសុខាភិបាលខ្មែរ-អាម៉េរិក ដែលបាន​ចុះមកជួយ​ពិនិត្យ​ព្យាបាល​ជំងឺជូន​បងប្អូន​នាពេលនេះ។ ឯកឧត្តមបន្តថា វាពិតជាការចូលរួមចំណែក​យ៉ាងសំខានក្នុង​ការលើកកម្ពស់​សុខមាភាព សុខភាពប្រជាពលរដ្ឋក្នុងខេត្ត។

ជាមួយគ្នានោះ ឯកឧត្តម អ៊ុ រាត្រី បានអំពាវនាវដល់បងប្អូនប្រជាពលរដ្ឋ​ដែលមាន​បញ្ហាសុខភាព​សូមរួសរាន់​មកពិនិត្យ និង​ទទួល​ការព្យាបាលដោយឥតគិតថ្លៃ៕ ដោយ ៖ ឧត្ដម