ប៉ាគីស្ថាន៖ ចំនួនអ្នកស្លាប់នៅក្នុងការបំផ្ទុះគ្រាប់បែកអត្តឃាត ដែលទំនងជាដាក់គោលដៅលើកងកម្លាំងនគរបាលដែលកំពុងធ្វើពិធីបួងសួងនៅក្នុងព្រះវិហារអ៊ីស្លាមក្នុងទីក្រុង Peshawar ប្រទេសប៉ាគីស្ថានបានកើនឡើងដល់ ៥៩នាក់។
ការបំផ្ទុះនេះបានកើតឡើងនៅម៉ោងប្រហែល 13:30នាទីរសៀលម៉ោងក្នុងស្រុក អំឡុងពិធីបួងសួងពេលរសៀលជិតព្រំដែនជាប់ប្រទេសអាហ្វហ្គានីស្ថាន។ លោកនាយករដ្ឋមន្ត្រី Shehbaz Sharif បាននិយាយថា ក្រុមភេរវករចង់បង្កការភ័យខ្លាចដោយការដាក់គោលដៅលើអ្នកទាំងឡាយដែលបំពេញតួនាទីការពារប្រទេសប៉ាគីស្ថាន។ ក្រុមតាលីបង់នៅប្រទេសប៉ាគីស្ថានបានទាត់ចោលរាល់ការជាប់ពាក់ព័ន្ធ ក្រោយមានការអះអាងបឋមដោយមេបញ្ជាការមួយរូបរបស់ខ្លួន។ ក្រុមនេះបានបញ្ចប់បទឈប់បាញ់កាលពីខែវិច្ឆិកា ហើយអំពើហិង្សាក៏បានចាប់ផ្ដើមកើនឡើងចាប់តាំងពីពេលនោះមក។
កាលពីខែធ្នូ ឆ្នាំ២០២២ កន្លងទៅ ក្រុមនេះបានដាក់គោលដៅលើប៉ុស្តិ៍នគរបាលមួយកន្លែងនៅក្នុងទីក្រុង Peshawar ដដែលនៅភាគភាគពាយ័ព្យប្រទេស ដែលបណ្ដាលឲ្យក្រុមសកម្មប្រយុទ្ធ ៣៣នាក់ស្លាប់។ អ្នកនាំពាក្យមន្ទីរពេទ្យមួយរូបបានប្រាប់សារព័ត៌មាន BBC ថា ចំនួនអ្នកស្លាប់សរុបបានកើនឡើងដល់ ៥៩នាក់ និង ១៥៧នាក់រងរបួស។
ស្នងការនគរបាលក្រុង Peshawar លោក Muhammad Ijaz Khan បានប្រាប់សារព័ត៌មានក្នុងស្រុកថា មន្ត្រីនគរបាលចន្លោះពី ៣០០ ទៅ ៤០០នាក់បានមានវត្តមាននៅក្នុងតំបន់នោះ នៅពេលមានការវាយប្រហារ។ ព្រះវិហារនេះស្ថិតក្នុងតំបន់មួយក្នុងចំណោមតំបន់ជាច្រើន ដែលមានការយាមកាមដ៏តឹងរ៉ឹងបំផុតនៃទីក្រុងនេះ ដែលរួមទាំងទីស្នាក់ការកណ្ដាលរបស់នគរបាល ការិយាល័យចារកម្ម និងប្រឆាំងអំពើភេរវកម្ម៕ អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
