ភ្នំពេញ ៖ គណៈកម្មការចំពោះកិច្ចចាក់វ៉ាក់សាំងកូវីដ១៩ បានសម្រេចបន្ថែមទីតាំងចាក់វ៉ាក់សាំងស៊ីណូវ៉ាក់ដូសទី២ ក្នុងខណ្ឌទួលគោក​អំឡុងពេល​នៃការអនុវត្តវិធានការបិទខ្ទប់ក្នុងភូមិសាស្ដ្ររាជធានីភ្នំពេញ និងក្រុងតាខ្មៅ ខេត្តកណ្ដាល។ នេះបើយោងតាមសេចក្តីជូណដំណឹង នៅថ្ងៃទី២៣ ខែមេសា។

​

សេចក្ដីជូនដំណឹងរបស់គណៈកម្មការចំពោះកិច្ចចាក់វ៉ាក់សាំងកូវីដ១៩ បានឱ្យដឹងថា ដើម្បីពន្លឿនការចាក់វ៉ាក់សាំងស៉ីណូវ៉ាក់ដូសទី២ គណៈកម្មការចំពោះកិច្ច បានសម្រេចបន្ថែមទីតាំងចាក់វ៉ាក់សាំងក្នុងខណ្ឌទួលគោកចំនួនមួយទីតាំងទៀត គឺនៅមន្ទីរពេទ្យកុមារជាតិ ដែលចាប់បើកដំណើរការចាក់វ៉ាក់សាំងស៊ីណូវ៉ាក់ដូសទី២ ចាប់ពីថ្ងៃទី២៤ ដល់ទី៣០ ខែមេសានេះ។

សេចក្តីជូនដំណឹងនេះបន្តថា ចំពោះបុគ្គលដែលដល់វេនចាក់វ៉ាក់សាំងស៊ីណូវ៉ាក់ដូសទី២ សូមអញ្ជើញទៅចាក់វ៉ាក់សាំង​នៅក្នុងទីតាំងដែល​ខ្លួនកំពុង​ស្នាក់នៅ ដោយមិនត្រូវឆ្លងខណ្ឌជាដាច់ខាត​សេចក្តីជូនដំណឹងនេះបានបញ្ជាក់ថា ចំពោះការ​ចាក់​វ៉ាក់សាំងស៊ីណូហ្វាម និងស៊ីណូវ៉ាក់ ដូសទី២ អាចចាក់អំឡុងពេល១៤ថ្ងៃ ទៅ២៨ថ្ងៃ បន្ទាប់ពីការចាក់វ៉ាក់សាំងដូសទី១ ក្នុងន័យនេះ សូមបុគ្គលដែលបា នយកសំណាក ឬកំពុងជាប់វិធាន​ចត្តាឡីស័ក ត្រូវអនុវត្តការធ្វើចត្តាឡីស័កឱ្យបានត្រឹមត្រូវតាមការណែនាំរបស់ក្រសួងសុខាភិបាល ទើបអាចទៅចាក់វ៉ាក់សាំងដូសទី២បាន ដើម្បីជៀសវាងការចម្លងណាមួយដល់អ្នកដ៏ទៃ ក៏ដូចជាការប្រឈមចំពោះផ្លូវច្បាប់។

ជាមួយគ្នានេះ គណៈកម្មការចំពោះកិច្ចចាក់វ៉ាក់សាំងកូវីដ១៩ ក្នុងក្របខណ្ឌទូទាំងប្រទេស បានស្នើឲ្យអាជ្ញាធរមូលដ្ឋានស្រង់ឈ្មោះបុគ្គល ដែលត្រូវចាក់​វ៉ាក់សាំងដូសទី២ ហើយកំពុងជាប់ចត្តាឡីស័កនៅតំបន់ក្រហមក្នុងរាជធានីភ្នំពេញ ផ្ញើមកគណៈកម្មការចំពោះកិច្ច តាមរយៈ​មន្ទីរសុខាភិបាល​រាជធានីភ្នំពេញ ដើម្បីរៀបចំកម្មវិធីចាក់វ៉ាក់សាំងដូសទី២ជូនពួកគាត់ផងដែរ។ បន្ថែមលើសពីនេះ គណៈកម្មការ​ចំពោះកិច្ច​ចាក់វ៉ាក់សាំងកូវីដ១៩ ក៏បានសំនូមពរដល់បុគ្គល ដែលកំពុងជាប់ធ្វើចត្តាឡីស័កហើយស្នាក់នៅ​តំបន់ក្រហមក្នុង​រាធានីភ្នំពេញ​ត្រូវទំនាក់ទំនង​ផ្តល់ព័ត៌មាន​ពាក់ព័ន្ធរបស់ខ្លួនទៅអាជ្ញាធរមូលដ្ឋានផងដែរ៕អត្ថបទ៖ ឧត្តម