ភ្នំពេញ៖ និវត្តជន និងអតីតយុទ្ធជនទាំងអស់សុទ្ធតែទទួលបាននូវប្រាក់សោធននិវត្តពីរាជ​រដ្ឋាភិបាល​កម្ពុជា។ ​ការផ្ដល់ប្រាក់សោធននិវត្ត ក៏ដូចជាការបន្តដំឡើងប្រាក់សោធននិវត្តនេះ ផ្ដល់ជាភាពកក់ក្ដៅ ​ការពេញចិត្តសម្រាប់មន្រ្តីចូលនិវត្ត ដែលបានលះបង់បំពេញភារកិច្ចការងារ​ជូនរដ្ឋ។

រាជរដ្ឋាភិបាលកម្ពុជា ក្រៅពីយកចិត្តទុកដាក់ចំពោះមន្រ្តីរាជការដែលកំពុងបំពេញភារកិច្ច រាជ​រដ្ឋាភិបាលក៏យកចិត្តទុកដាក់ ចំពោះមន្រ្តីស៊ីវិលចូលនិវត្ត ​ក៏ដូចជាអតីតយុទ្ធជនផងដែរ។ ជាក់ស្ដែងគឺរាជរដ្ឋាភិបាលកម្ពុជា ​បានផ្ដល់ថវិកាសោធននិវត្តជាប្រចាំខែ និងតែងមាន​ការដំឡើងប្រាក់សោធនជូនមន្រ្តីចូលនិវត្ត ​និងអតីតយុទ្ធជនទូទាំងប្រទេស។

នេះជាការលើកឡើងរបស់ ​ឯកឧត្តម ឈួរ សុបញ្ញា ប្រតិភូរាជរដ្ឋាភិបាលទទួលបន្ទុក​ជា​អគ្គនាយកនៃមូលនិធិជាតិជំនួយសង្គម។

ការបើកសាច់ប្រាក់សោធននិវត្តជាក់ស្ដែង ធ្វើឡើងនៅថ្ងៃ ៣១ ខែមករានេះ ជាការបើកសាច់​ប្រាក់​លើកទី ២ សម្រាប់ខែ មករា ឆ្នាំ ២០២៣។ មន្រ្តីចូលនិវត្ត ក៏ដូចជាអតីតយុទ្ធជន រស់នៅ​រាជធានី​ភ្នំពេញ អាចទៅបើកសាច់ប្រាក់នៅ ​ធនាគារកាណាឌីយ៉ា រីក្រុមគោលដៅ​ដែលរស់នៅ​បណ្ដា​ខេត្តផ្សេងទៀត គឺទៅបើកសាច់ប្រាក់នៅ ​ធានាគារអេស៊ីលីដា។

អំឡុងពេលមកបើកសាច់ប្រាក់នៅធនាគារ ​កាណាឌីយ៉ា ​នាថ្ងៃនេះ មន្រ្តីចូលនិវត្តបានបង្ហាញ​នូវភាព​ពេញចិត្តជាខ្លាំង ចំពោះរាជរដ្ឋាភិបាលដែលបានផ្ដល់ប្រាក់សោធន ផ្ដល់ការដំឡើងសាច់ប្រាក់​ជា​ប្រចាំជូនពួកគាត់។ ពួកគាត់ជាសប្បាយចិត្តចំពោះការតបស្នងមួយនេះ។ ការបើកប្រាក់​សោធននិវត្តនេះ ជាក់ស្ដែងធ្វើឡើង ២ដង ក្នុងមួយខែ។

ឯកឧត្តម ឈួរ សុបញ្ញា ប្រតិភូរាជរដ្ឋាភិបាលទទួលបន្ទុកជាអគ្គនាយក មូលនិធិជាតិជំនួយ​សង្គមលើកឡើងថា ​ការបើកសាច់ប្រាក់ក្នុងពេលបច្ចុប្បន្ន គឺមានមន្រ្តីរាជការស៊ីវិលចូល​និវត្ត​ក្នុងរង្វង់ជិត ៦ម៉ឺននាក់ ​និងអតីតយុទ្ធជនក្នុងរង្វង់ ៥ទៅ៦ម៉ឺននាក់ផងដែរ។​ ជាប្រចាំខែ គឺរាជ​រដ្ឋាភិបាលកម្ពុជាចំណាយថវិកាប្រមាណ​ ៣០លានដុល្លារក្នុងមួយខែ។ ​សាច់ប្រាក់ទទួលបាន គឺមាន​ភាពផ្សេងគ្នា ហើយការទទួលបានគឺតិចបំផុត ៦០ភាគរយនៃប្រាក់បៀវត្សមុនពេល​ពួកគេចូលនិវត្ត។

តាមការបញ្ជាក់របស់ប្រតិភូរាជរដ្ឋាភិបាលទទួលបន្ទុកជាអគ្គនាយក មូលនិធិជាតិជំនួយសង្គម បច្ចុប្បន្នក្រុមការងារជំនាញ ក៏កំពុងគិតគូពីការផ្តល់អត្ថប្រយោជន៍​បន្ថែមជូន​ក្រុមគោល​ដៅទាំងពីរផងដែរ។ អត្ថប្រយោជន៍ទាំងនេះរួមមាន​ ប្រព័ន្ធកម្ចីក្នុងអាត្រាការប្រាក់ទាប ដោយ​មិនទាមទារទ្រព្យបញ្ចាំ ​និងការសហការជាមួយវិស័យឯកជន ក្នុងការបញ្ចុះតម្លៃនានាជាដើម៕ អត្ថបទ៖ គឹមហុក