ភ្នំពេញ៖ ការនាំចេញផលិតផល​សំលៀកបំពាក់ ស្បែកជើង និងសម្ភារៈធ្វើដំណើររបស់កម្ពុជា​ទៅ​កាន់ទីផ្សារអន្តរជាតិ នៅក្នុងឆ្នាំ ២០២២ មានទំហំទឹកប្រាក់ជាង ​១២ ពាន់លានដុល្លារអាមេរិក ការកើនឡើងប្រមាណ ១៥ ភាគរយ បើប្រៀបធៀបទៅនិងទំហំនៃការនាំចេញក្នុងឆ្នំា២០២១។

ក្នុងរបាយការណ៍ នៃការចេញផលិតផលសំខាន់ៗរបស់កម្ពុជា ​នៅក្នុងពិធីបូកសរុបការងារ​ពាណិជ្ជកម្មឆ្នាំ ២០២២ ​និងលើកទិសដៅឆ្នាំថ្មី នៅថ្ងៃទី ៣០ ខែ មករា ឆ្នាំ ២០២៣ នេះ ក្រសួង​ពាណិជ្ជកម្ម លើកឡើងថា ការនាំចេញទំនិញសំខាន់ៗ​របស់កម្ពុជា ​នៅក្នុងឆ្នាំ ២០២២ មាន​ទំហំទឹកប្រាក់សរុបប្រមាណជាង ២២ ពាន់លានដុល្លារអាមេរិក កើនឡើងជាង ១៦ ភាគរយ បើធៀបទៅឆ្នាំ ២០២១។

ក្នុងនោះការនំាចេញ​សំលៀកបំពាក់ មានទឹកប្រាក់ជាង ៩ ​ពាន់លានដុល្លារអាមេរិក ​បានកើឡើង ១៣ ​ភាគរយ, ស្បែកជើង ​មានចំនួន ១,៧ ពាន់លានដុល្លារអាមេរិក​ បានកើនឡើង ២៥ ភាគរយ និង​ការនាំចេញសម្ភារៈធ្វើដំណើរ មានទំហំទឹកប្រាក់ជាង ​១,៧ ​លានដុល្លារអាមេរិកផងដែរ ។ ដោយ​បាន​កើនឡើងប្រមាណ ​១៩ ភាគរយ​ បើប្រៀបធៀបនិងឆ្នំា២០២១។

អ្នកឧកញ៉ា លី ឃុនថៃ ប្រធាន​ក្រុមសមាគមផលិតស្បែកជើងកម្ពុជា ​បានថ្លែងថា សមាគម​សង្កេត​ឃើញថា ការបញ្ជាទិញមានការធ្លាក់ចុះ, ចំណែកនៅក្នុងឆ្នាំ ២០២៣ នេះ មើលទៅ​ស្ថានភាព​នៃការបញ្ជាទិញស្បែកជើង និងកាបូប ​ក៏នឹងអាចថមថយ​ចុះផងដែរ។ ​ក្នុងនោះបើតាមការព្យាករ ការធ្លាក់​ចុះបរិមាណនៃការបញ្ជាទិញផលិតផលស្បែកជើង ​និងកាបូប នេះ អាចស្ថិតក្នុងកម្រិតប្រហែលជា ៣០ ឬ ៤០ ភាគរយ។

អ្នកឧកញ៉ា បន្តថា ទោះបីក្នុងពេលបច្ចុប្បន្ន ការបញ្ជាទិញមានការថមថយចុះ តែនៅក្នុងរយៈពេល​ទៅមុខ វិស័យស្បែកជើង កាបូប ​និងផលិតផលធ្វើដំណើរ កម្ពុជាគឺជាប្រទេសមួយ​ដែល​ទាក់ទាញវិនិយោគិន ​និងអ្នកធ្វើធុរកិច្ចផ្សេងៗទៀតអាចហូរចូលមកជាបន្តបន្ទាប់ និងនៅក្នុង​រយៈពេលវែង កម្ពុជានឹងស្រូបយកសក្តានុពលវិនិយោគលើផ្នែកនេះ​បានកាន់តែច្រើន ស្របពេល​រាជរដ្ឋាភិបាលបានលើកទឹកចិត្តដល់នាំចូលវត្ថុធាតុដើម ​និងការនាំចូលសម្ភារៈ ឬម៉ាស៊ីន​ផលិត​ដោយរួចពន្ធ ហើយសម្រាប់ការនាំចេញ ​កម្ពុជាក៏មានភាពអនុគ្រោះពន្ធរយៈវែងសមរម្យផងដែរ៕អត្ថបទ៖ សុន រ៉ាឌី