ភ្នំពេញ៖ ក្រសួងសុខាភិបាលបានប្រកាសនៅថ្ងៃនេះថា ពលរដ្ឋខ្មែរ ២នាក់បានស្លាប់បាត់បង់ជីវិតដោយសារជំងឺកូវីដ១៩កាលពីថ្ងៃម្សិលមិញនេះ ដែលនាំឱ្យចំនួនមនុស្សស្លាប់ដោយសារមេរោគផ្លូវដង្ហើមនេះ កើនដល់ ៦១នាក់ នៅត្រឹមថ្ងៃនេះ។
ក្នុងសេចក្ដីប្រកាសរបស់ខ្លួននៅថ្ងៃនេះ ក្រសួងសុខាភិបាលនិយាយថា បុរសជនជាតិខ្មែរម្នាក់អាយុ ៤០ឆ្នាំ ដែលរស់នៅក្នុងស្រុកគិរីវង្ស ខេត្តតាកែវ បានស្លាប់កាលពីរសៀលថ្ងៃម្សិលមិញនេះនៅឯមន្ទីរពេទ្យស្វាយជ្រុំ បន្ទាប់ពីគាត់ត្រូវបានរកឃើញឆ្លងមេរោគកូវីដ១៩ កាលពីថ្ងៃទី១៥ ខែមេសា។
ក្រសួងសុខាភិបាលបញ្ជាក់ថា បុរសខ្មែររូបនេះបានស្លាប់បាត់បង់ជីវិត បន្ទាប់ពីសួតទាំងសងខាងរបស់គាត់ បានរលាកធ្ងន់ធ្ងរដែលបង្កឡើងដោយមេរោគកូវីដ១៩ បន្ថែមទៅលើជំងឺប្រចាំកាយរបស់គាត់ផងដែរ។
ចំណែកឯបុរសជនជាតិខ្មែរម្នាក់ទៀតអាយុ ៥៦ឆ្នាំ ដែលរស់នៅក្រុងបាវិត ខេត្តស្វាយរៀង ក្រសួងសុខាភិបាលបញ្ជាក់ថា បានស្លាប់បាត់បង់ជីវិតកាលពីយប់ថ្ងៃម្សិលមិញនេះ នៅឯមន្ទីរពេទ្យបង្អែកស្វាយជ្រុំ បណ្ដាលមកពីរលាកសួតធ្ងន់ធ្ងរដែលបង្កឡើងដោយមេរោគកូវីដ១៩។
ក្រសួងបញ្ជាក់ថា បុរសខ្មែររូបនេះ ត្រូវបានបញ្ជូនទៅសម្រាកព្យាបាលនៅមន្ទីរពេទ្យកាលពីថ្ងៃទី០១ ខែមេសា បន្ទាប់ពីគាត់ត្រូវបានរកឃើញឆ្លងមេរោគកូវីដ១៩។
គិតមកត្រឹមថ្ងៃនេះ កម្ពុជាមានមនុស្ស ៦១នាក់ហើយ បានស្លាប់ដោយសារមេរោគកូវីដ១៩នៅទូទាំងប្រទេសចាប់តាំងពីប្រទេសនេះប្រកាសករណីស្លាប់ជាលើកដំបូងជាផ្លូវការកាលពីថ្ងៃទី១១ ខែមីនាកន្លងមកនេះ៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
