កំពង់ចាម៖ ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា បានមានប្រសាសន៍ថា សកម្មភាព ស.ស.យ.ក មិនត្រឹមតែធ្វើឡើងដើម្បីក្រុមគ្រួសារ ស.ស.យ.ក ប៉ុណ្ណោះទេ ប៉ុន្តែគឺជា​សកម្មភាពមួយ ដែលជះឥទ្ធិពលដល់សង្គម និងយុវជនដទៃ ឲ្យមានទម្លាប់ចូលរួម​ចំណែក​ជាមួយការងារសង្គម និងបណ្ដុះស្មារតីយុវជន​ ឲ្យតស៊ូលះបង់ដើម្បីកម្ពុជានាពេលអនាគត ។

ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា ក្នុងពិធីសម្ពោធដាក់ឲ្យប្រើប្រាស់​ជា​ផ្លូវការនូវអគារពហុបំណង ​និង​សមិទ្ធផល​នានា​របស់​សហភាពសហព័ន្ធយុវជនកម្ពុជា ខេត្ត​កំពង់ចាម ​និងពិធីសំណេះសំណាល ជាមួយគណៈកម្មាធិការឃុំ សង្កាត់ ក្រុង ស្រុក ខេត្ត នៅក្នុង​រចនា​សម្ព័ន្ធ​សហភាពសហព័ន្ធយុវជនកម្ពុជា​ខេត្តកំពង់ចាម ​នៅថ្ងៃទី៣១ ខែមករា នេះ បានថ្លែងនូវ​ការកោតសរសើរ ចំពោះកិច្ចខិតខំប្រឹងប្រែងរបស់សមាជិក​ សមាជិកា ស.ស.យ.ក ខេត្តកំពង់ចាម ដែលសម្រេចបានសមិទ្ធផលជាច្រើន ។

ឯកឧត្តម បានបន្ថែមថា សមិទ្ធផល ​ដែលសម្រេចបានក្នុងថ្ងៃនេះ ​មិនត្រឹមតែបង្ហាញឲ្យឃើញពីភាព​ជោគ​ជ័យរបស់​សមាជិក សមាជិកាសហភាពសហព័ន្ធយុវជនកម្ពុជា​ ខេត្តកំពង់ចាម ​នោះទេ ប៉ុន្តែ គឺជាមូលដ្ឋានដ៏សំខាន់ក្នុងការជំរុញ​ និងបង្កើនប្រសិទ្ធភាពការងាររបស់ ​ស.ស.យ.ក ឱ្យកាន់តែល្អ​ប្រសើរថែមទៀត ។

យុវជន ស.ស.យ.ក ខេត្តកំពង់ចាម ​បានបង្ហាញក្តីសប្បាយរីករាយ ពេលស.ស.យ.ក មាន​សមិទ្ធផលថ្មី ដើម្បីការងារយុវជន ។

អគារពហុបំណងរបស់សហភាពសហព័ន្ធយុវជនកម្ពុជា ​ខេត្តកំពង់ចាម ​មានទំហំ១៣ គុណ​នឹង២០ម៉ែត្រ ដែលចំណាយថវិកាអស់ប្រមាណ ​៣០ម៉ឺនដុល្លារ ដោយមានការ​ឧបត្ថម្ភគាំទ្រ​ពីសំណាក់យុវជន​ សប្បុរសជន ​និងថ្នាក់ដឹកនាំនានា ៕អត្ថបទ៖ ថុង សីហា