ក្រចេះ៖ ឯកឧត្ដម វ៉ា ថន អភិបាលខេត្តក្រចេះ ថ្លែងឱ្យដឹងថា រដ្ឋបាលខេត្តបាន​នឹងកំពុងយកចិត្តទុកដាក់​ជំរុញការ​អភិវឌ្ឍតំបន់រមណីយដ្ឋានទេសចរណ៍ដែលមាននៅក្នុងខេត្តសរុប ២១ កន្លែងក្នុងនោះរមណីយដ្ឋានវប្បធម៌ប្រវត្តិសាស្ត្រ ៦ កន្លែង រមណីយដ្ឋានធម្មជាតិ ១១ កន្លែង និងរមណីយដ្ឋានវប្បធម៌ធម្មជាតិ ១ កន្លែង រមណីយដ្ឋានវប្បធម៌កែច្នៃចំនួន ៣ កន្លែង និងមានរមណីយដ្ឋានបម្រុងទុកចំនួន ១ កន្លែង។

​ឯកឧត្ដម វ៉ា ថន បញ្ជាក់ថាបែបនេះ ក្នុង សន្និសីទសារព័ត៌មាន ស្ដីពី «ភាពជោគជ័យក្នុងរយៈពេល ៥ឆ្នាំកន្លងមក របស់រដ្ឋបាលខេត្តក្រចេះ» ដែលរៀបចំដោយ អង្គភាពអ្នកនាំពាក្យរាជរដ្ឋាភិបាល នៅថ្ងៃទី៣១ ខែមករា ឆ្នាំ២០២៣ នៅទីស្ដីការគណៈរដ្ឋមន្រ្ដី។

​ឯកឧត្ដមថ្លែងថា វិស័យទេសចរណ៍ គឺជាវិស័យអាទិភាពមួយក្នុងចំណោមវិស័យអាទិភាព​សំខាន់ៗរបស់​ខេត្ត​ពិសេស​ខេត្តក្រចេះមានសត្វផ្សោតទន្លេមេគង្គ មានសំណង់អគារវ័យចំណាស់ពីសម័យអាណានិគមនិយមបារាំង និង ជាដែនដីដែលពោរពេញដោយប្រវត្តិសាស្រ្តយូរលង់ណាស់មកហើយ។

ឯកឧត្ដមបន្តថា បច្ចុប្បន្នខេត្តមានសត្វផ្សោតរស់នៅប្រមាណ ៨០ ក្បាល ដែលតំបន់នេះត្រូវបានអភិវឌ្ឍន៍ និងកែច្នៃជា​រមណីយដ្ឋានទេសចរណ៍កំពុងទាញយកភ្ញៀវទេសចរជាតិ-អន្តរជាតិមកទស្សនា និងកម្សាន្តដោយ​មានកំណើន​ជារៀងរាល់ឆ្នាំ។

បើតាមឯកឧត្ដមអភិបាលខេត្ត អាជីវកម្ម សេវាកម្មទេសចរណ៍ក្នុងខេត្ត មានសណ្ឋាគារ ១៥ កន្លែង មាន ៦២២ បន្ទប់។ ផ្ទះសំណាក់ ៥២ កន្លែង មាន ៥១៣ បន្ទប់។ ភោជនីយដ្ឋាន-អាហារដ្ឋាន ១៥៥ កន្លែង ស្មើនឹង ១,៣២២ តុ និង ៥.៨៣៦ កៅអី។ សេវាកម្សាន្តមនុស្សពេញវ័យដូចជាខារ៉ាអូខេចំនួន ២៣ កន្លែង ស្មើនឹង ១១២ បន្ទប់ ហាងម៉ាស្សា ចំនួន ១១ កន្លែង ស្មើនឹង ៤២ បន្ទប់ និង ៧៨ គ្រែ។

បើតាមរបាយការណ៍របស់រដ្ឋបាលខេត្ត ក្នុងឆ្នាំ២០២២ ខេត្តទទួលបានភ្ញៀវទេសចរណ៍សរុប ៣៦៣.៩៨២ នាក់ ក្នុងនោះភ្ញៀវ ទេសចរណ៍អន្តរជាតិចំនួន ៧០៦៥ នាក់ និងភ្ញៀវទេសចរណ៍ជាតិ ៣៥៦.៩១៧ នាក់៕ អត្ថបទ៖ វ៉ន ដារ៉ា