ភ្នំពេញ៖ រដ្ឋបាលរាជធានីភ្នំពេញ សម្រេចបិទជាបណ្ដោះអាសន្ននូវដំណើរការផ្សាររដ្ឋ និងផ្សារមិនរៀបរយទាំងអស់នៅទូទាំងរាជធានីភ្នំពេញ ដើម្បីកាត់ផ្ដាច់ការឆ្លងរីករាលដាលនៃមេរោគកូវីដ១៩។
ក្នុងសេចក្ដីណែនាំនៅថ្ងៃនេះ អភិបាលរាជធានីភ្នំពេញ លោក ឃួង ស្រេង បានណែនាំឱ្យផ្អាកដំណើរការផ្សាររដ្ឋ និងផ្សារមិនរៀបរយទាំងអស់ចាប់ពីថ្ងៃស្អែកនេះរហូតដល់ថ្ងៃទី០៧ ខែឧសភាខាងមុខនេះ។
បើតាមសេចក្ដីណែនាំនេះ ផ្សារមិនរៀបររយដូចជា ផ្សារក្រមួន ផ្សារចាត់តាំង ផ្សារតាមរោងចក្រ ផ្សារសហគមន៍ ផ្សារក្នុងដីឡូតិ៍ឯកជន ផ្សារជុំវិញមន្ទីរពេទ្យ និងផ្សារតាមចិញ្ចើមផ្លូវ ជាដើម ត្រូវបានអាជ្ញាធរសម្រេចឱ្យផ្អាកលក់ដូរ និងចេញចូលជាបណ្ដោះអាសន្នសិន ចាប់ពីថ្ងៃស្អែកនេះ។
សាលារាជធានីភ្នំពេញ ក៏បានប្រាប់ទៅអាជីវករ សន្តិសុខផ្សារ បុគ្គលិក ឬកម្មករបម្រើការងារក្នុងផ្សារ និងសមាជិកក្រុមគ្រួសារពាក់ព័ន្ធទាំងអស់ ត្រូវចូលរួមធ្វើតេស្តពិនិត្យរកមេរោគកូវីដ១៩។
សាលារាជធានីភ្នំពេញ បានបញ្ជាក់ក្នុងសេចក្ដីណែនាំនោះថា វិធានការនេះបានកើតឡើងក្រោយពីសង្កេតឃើញកំណើននៃការឆ្លងរីករាលនៃមេរោគកូវីដ១៩នៅក្នុងចំណោមអាជីវករនៅតាមផ្សារនានា។
រាជធានីភ្នំពេញ បានរកឃើញមនុស្សរាប់រយនាក់ឆ្លងមេរោគកូវីដ១៩ក្នុងមួយថ្ងៃៗអស់រយៈពេលជាច្រើនថ្ងៃមកហើយ ដែលនាំឱ្យអាជ្ញាធរបានបិទផ្សារធំៗជាបន្តបន្ទាប់៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
