​ប៉ាគីស្ថាន៖ ភាគច្រើន​នៃ​អ្នកស្លាប់​ក្នុងការ​បំផ្ទុះ​គ្រាប់បែក​អត្តឃាត​នៅក្នុង​ទីក្រុង Peshawar ប្រទេស​ប៉ា​គី​ស្ថាន​គឺជា​នគរបាល។ អ្នករបួស​បាន​កើន​ឡើង​ដល់ ​២២៥​នាក់​។

​មន្ត្រី​វេជ្ជសាស្ត្រ​មួយរូប​បាន​និយាយថា ចំនួន​អ្នកស្លាប់​ពី​ការ​បំផ្ទុះ​គ្រាប់បែក​អត្តឃាត​ នៅ​ព្រះវិហារ​អ៊ីស្លាម​មួយ​កន្លែង​ក្នុង​ភាគ​ពាយព្យ​នៃ​ទីក្រុង Peshawar ប្រទេស​ប៉ា​គី​ស្ថាន​បាន​កើន​ឡើង​ដល់ ​១០០​នាក់​។ ខណៈ​ប្រទេស​នៅ​អាស៊ី​ខាងត្បូង​មួយ​នេះប្រឈម​នឹង​ហានិភ័យ​សន្តិសុខ​ ដែល​ចេះតែ​កើន​ឡើង​ពី​ក្រុម​ប្រដាប់អាវុធ​។ លោក Mohammad Asim អ្នកនាំពាក្យ​មន្ទីរ​វេជ្ជសាស្ត្រ​ដ៏​ធំ​បំផុត​ក្នុង​ទីក្រុង​នេះ បាន​និយាយ​នៅ​ក្នុង​សេចក្ដីថ្លែងការណ៍​មួយ​កាលពី​ថ្ងៃ​អង្គា​រថា សាកសព​ចំនួន​ ១០០​នាក់​ត្រូវ​បាន​បញ្ជូន​ទៅកាន់​មន្ទីរពេទ្យ Lady Reading Hospital,”​។​ ​លោក Kashif Aftab Abbasi ប្រធាន​ប្រតិបត្តិការ​នគរបាល​នៅ​ក្នុង​ទីក្រុង Peshawar បាន​ប្រាប់​សារព័ត៌មាន Al Jazeera ថា មនុស្ស​ជាង ​២២៥​នាក់​បាន​រង​របួស​ក្នុង​ការ​បំផ្ទុះ​នោះ​។

​ក្រុម​អាជ្ញាធរ​បាន​និយាយ​ថា ដំបូល​អគារ​ព្រះវិហារ​ដែល​ស្ថិតនៅ​ខាងក្នុង​បរិវេណ មានការ​យាមកាម​សន្តិសុខ​ដ៏​តឹងរ៉ឹង​របស់​រដ្ឋាភិបាល បាន​បាក់​រលំ​ដោយសារ​ការ​បំផ្ទុះ​គ្រាប់បែក ហើយ​ក្រុម​អ្នក​ជួយសង្គ្រោះ​បាន​កាយ​កម្ទេច​ថ្ម ដើម្បី​ស្វែងរក​សាកសព​។​ ​ការវាយប្រហារ​នេះគឺជា​ហេតុការណ៍​ដ៏​ធំ​បំផុតនៅក្នុង​ទីក្រុង Peshawar ក្នុង​រយៈពេល​មួយ​ទសវត្សរ៍​មកនេះ និង​បាន​កើតឡើង​អំឡុង​មាន​អំពើហិង្សា​កើនឡើង​ខ្លាំង​ដាក់​គោលដៅ​លើ​នគរបាល​៕ អត្ថបទ៖ សុខមាន