ភ្នំពេញ៖ សហព័ន្ធស្រូវអង្ករកម្ពុជា បានដាក់ទិសដៅចំនួនពីរក្នុងការនាំចេញអង្ករកម្ពុជា ទៅក្រៅប្រទេស ក្នុងនោះ សម្រាប់ឆ្នាំ ២០២៣ នឹងជំរុញការនាំចេញឱ្យបាន ៧៥ ម៉ឺនតោន និងឈានទៅនាំចេញដល់ ១ លានតោននៅឆ្នាំ២០២៥។

នេះតាមលោក ចាន់ សុឃាំង ប្រធានសហព័ន្ធស្រូវអង្ករកម្ពុជា ថ្លែងក្នុងសន្និបាតបូករុបការងារ​ពាណិជ្ជកម្មឆ្នាំ២០២២ និងលើកទិសដៅការងារពាណិជ្ជកម្មឆ្នាំ២០២៣ របស់ក្រសួងពាណិជ្ជកម្ម នៅថ្ងៃទី៣០ ខែមករា ឆ្នាំ២០២៣នេះ។

លោក ចាន់ សុឃាំង បានថ្លែងថា ទិសដៅសម្រាប់ឆ្នាំ ២០២៣ សហព័ន្ធស្រូវអង្ករកម្ពុជា បានកំណត់​យកគោលដៅចំនួន ២ ធំ គឺ ទី១ ជំរុញការនាំចេញអង្ករឱ្យបាន ៧៥ ម៉ឺនតោននៅក្នុងឆ្នាំ២០២៣ និងឈានដល់ ១ លានតោនអង្ករនៅឆ្នាំ២០២៥។ ទី២ បង្កភាពងាយស្រួលក្នុងការ​ប្រកបរបរ​អាជីវកម្មក្នុងវិស័យស្រូវអង្ករប្រកបដោយប្រាក់ចំណេញ ភាពធន់ និរន្តភាព និងបរិយាបន្ន ដោយដាក់ចេញនូវសកម្មភាពសំខាន់មួយចំនួន។

លោកបញ្ជាក់ថា សកម្មភាពទាំងនោះរួមានបន្តពង្រឹងអភិបាលកិច្ចនៃកិច្ចដឹកនាំ​របស់សហព័ន្ធស្រូវ​អង្ករកម្ពុជាឱ្យកាន់តែប្រសើរឡើង និងទទួលបានទុកចិត្តពីសមាជិក និងភាគីពាក់ព័ន្ធ និងរៀបចំ​ផែនការ​យុទ្ធសាស្ត្ររយៈពេល ៥ឆ្នាំ (២០២៣-២០២៧)។ បន្តសហការជាមួយក្រសួងពាណិជ្ជកម្ម តាមរយៈក្រុមហ៊ុន ហ្គ្រីនត្រេដ ក្នុងការបើកច្រកទីផ្សារថ្មី ជាពិសេសប្រទេសហ្វីលីពីន និងពង្រីក​សក្តានុពលទីផ្សារផ្សេងទៀតតាមរយៈការចូលរួមតាំងពិព័រណ៍ពាណិជ្ជកម្មនៅមជ្ឈឹមបូព៌ា សហគមន៍អឺរ៉ុប។ លើសពីនេះសហព័ន្ធស្រូវអង្ករកម្ពុជាក៏បន្តនឹងការពង្រីកសក្តានុពលនឹងស្នើបង្កើនបរិមាណនាំចេញទៅកាន់ទីផ្សារប្រទេសចិនឱ្យបានច្រើនជាង ៤០ ម៉ឺនតោននៅក្នុងឆ្នាំ២០២៣នេះតទៅ និងចូលរួម​ក្នុង​ការដោះស្រាយបញ្ហាការគ្រប់គ្រងសន្និធិស្បៀងក្នុងស្រុកជាមួយក្រសួងបន្ថែមទៀត៕