កំពង់ឆ្នាំង៖ នៅព្រឹកថ្ងៃទី០១ ខែកុម្ភៈ ឆ្នាំ២០២៣នេះ ប្រជាពលរដ្ឋនៅក្នុងក្រុងកំពង់ឆ្នាំង បាន​សំដែង​នូវ​ការពេញចិត្ត ក្រោយពីអាជ្ញាធរក្រុង និងខេត្តកំពង់ឆ្នាំង បានផ្លាស់​ប្តូរ​ក្រុម​ហ៊ុន​ប្រមូល​សំរាម​ក្នុង​ក្រុងកំពង់ឆ្នាំង និងប្រមូលបានទៀងទាត់ពេលវេលា ធ្វើអោយ​សំរាម​នៅ​ក្នុង​ក្រុង​កំពង់​ឆ្នាំង​មិន​មានកកកុញនៅតាមទីតាំងដាក់សំរាម នៅតាមសួនច្បារ និងតាម​ផ្លូវ​ទាំងអស់​ក្នុង​ក្រុង​កំពង់ឆ្នាំង ។ កត្តាទាំងនេះ នាំអោយ​ប្រជាពលរដ្ឋ​កោត​សរសើរ​ដល់​ការ​ដឹកនាំ​របស់​អាជ្ញាធរ​ក្រុង​ខេត្ត​កំពង់ឆ្នាំង និងការខិតខំរបស់ក្រុមហ៊ុនប្រមូលសំរាមផងដែរ។

តំណាងប្រជាពលរដ្ឋ ៦នាក់បានអោយដឹងថា កាលពីមុន សំរាមនៅក្នុងក្រុងកំពង់ឆ្នាំង គឺមាន​ពាស​ពេញ​កន្លែងដាក់សំរាម នៅតាមផ្លូវមានថង់ហោះរប៉ាត់រប៉ាយ និងមានជះ​ក្លិន​ស្អុយ​នាំ​អោយ​ប៉ះ​ពាល់​ដល់សុខុមាលភាពប្រជាពលរដ្ឋ និងអ្នកធ្វើដំណើរតាមផ្លូវផងដែរ។ ដោយសារការយកចិត្តទុកដាក់របស់ឯកឧត្តម ស៊ុន សុវណ្ណារិទ្ធិ អភិបាលខេត្ត និងលោក ហ៊ីង ភ័ព្វមីនា អភិបាល​ក្រុងកំពង់ឆ្នាំង បានផ្លាស់ប្តូរក្រុមហ៊ុនប្រមូលសំរាម ហើយមកដល់ពេលនេះ មិនមានសំរាមទៀតទេនៅតាមទីតាំងដាក់សំរាម សួនច្បារ និងតាមផ្លូវសាធារណៈ។ ពួកគាត់​ក៏​ចង់​អោយ​ក្រុមហ៊ុនប្រមូលសំរាមមួយនេះ បន្តសកម្មភាពបែបនេះតទៅទៀត ដើម្បី​បរិស្ថាន​ក្រុង​កំពង់​ឆ្នាំង ជាពិសេសដើម្បីសុខុមាលភាពប្រជាពលរដ្ឋទូទៅ។

 លោក ភាព ភារិទ្ធ ប្រធានគ្រប់គ្រងក្រុមហ៊ុនប្រមូលសំរាមក្រុងកំពង់ឆ្នាំង បានអោយដឹងថា ដោយ​សា​រ​មានការចង្អុលបង្ហាញពីលោក ហ៊ីង ភ័ព្វមីនា អភិបាលក្រុង និងឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង បានជំរុញអោយក្រុមហ៊ុនលោក ត្រូវ​ប្រមូល​សំរាម​ជាប់​ជា​ប្រចាំមិ​ន​អោយមានការកកស្ទះសំរាមក្នុងក្រុងនោះឡើយ ដើម្បីអនាម័យ បរិស្ថាន និង​សោភ័ណភាព​ក្នុង​ក្រុងកំពង់ឆ្នាំង។ ការប្រមូលសំរាមនេះ គឺលោកបាន​ប្រើប្រាស់​រថយន្ត​ចំនួន ៦គ្រឿង ហើយក្នុង១គ្រឿងត្រូវដឹកចំនួន៣ជើងក្នុង១ថ្ងៃ។ ដោយសារ​កំណើន​ប្រជាពលរដ្ឋ​កើន​ឡើង ធ្វើអោយសំរាមដែលប្រមូលក្នុង១ថ្ងៃៗ កើនឡើងចាប់ពី៣០តោនទៅ៣៥តោន។

ឯកឧត្តម ស៊ុន សុវណ្ណារិទ្ធិ អភិបាលខេត្ត ក៏បានសំណូមពរដល់ប្រជាពលរដ្ឋមួយចំនួន មេត្តា​ចូលរួម​ក្នុង​ការវេចខ្ជប់សំរាមអោយបានត្រឹមត្រូវ កុំយកសំរាមទៅបោះចោលពាសវាលពាសកាល ខុស​ទី​តាំងដាក់សំរាម នាំអោយទីក្រុងយើងមិនស្អាត មានសំរាមហោះហើរតាមសួន តាមផ្លូវ​សាធារណៈ ឬមានសំរាមនៅតាមមុខផ្ទះរបស់បងប្អូន។ ការចូលរួមរបស់បងប្អូន គឺជា​ការ​រួម​ចំណែក​មួយ​ដ៏សំខាន់ ក្នុងការដណ្តើមយកជ័យលាភីទីក្រុងស្អាតរំដួល៣ទង និងនាំអោយ​ខេត្ត​យើង​មាន​កិត្តិយសដោយសារបងប្អូន៕ ហុង វាស្នា