កំពង់ធំ៖ នៅថ្ងៃទី១ ខែកុម្ភៈ ឆ្នាំ២០២៣នេះ ឯកឧត្តមកិត្តិសង្គហបណ្ឌិត គន់ គីម ទេសរដ្ឋមន្ត្រី អនុប្រធានទី១នៃគណៈកម្មាធិការជាតិគ្រប់គ្រងគ្រោះមហន្តរាយ បានអញ្ជើញចុះពិនិត្យ​ស្ថានភាព​ការបង្កបង្កើនផលដំណាំស្រូវឡើងវិញរបស់បងប្អូនប្រជាកសិករ ក្រោយទទួលរងផងប៉ះពាល់​ដោយសារទឹកជំនន់ នៅសង្កាត់អូរគន្ធរត្បូង ក្រុងស្ទឹងសែន ខេត្តកំពង់ធំ។

ក្នុងពេលចុះពិនិត្យឯកឧត្តមទេសរដ្ឋមន្រ្តី គន់ គីម បានឲ្យដឹងថា តបតាមអនុសាសន៍របស់​សម្តេច​តេជោ ហ៊ុន សែន នាយករដ្ឋមន្ត្រីស្តីពីការត្រួតពិនិត្យលើផលប៉ះពាល់ដំណាំស្រូវ និង​ដំណាំរួមផ្សំ ដែលខូចខាតដោយសារទឹកជំនន់គឺចាំបាច់ត្រូវពន្លឿន និងជំរុញនៃការបង្ក​បង្កើនផលរបស់ប្រជា​កសិករ​ក្នុងគ្រួសារនីមួយៗ ។

ឯកឧត្តម ទេសរដ្ឋមន្ត្រី ថ្លែង ថា បេសកកម្ម ចុះពិនិត្យការស្តារឡើងវិញនាពេលនេះ សង្កេតឃើញ​ថា​លើផ្ទៃដីស្រែស្តារឡើងវិញទទួលបានផលល្អ និងយ៉ាងហោចណាស់ក្នុងមួយគ្រួសារ​ជាមធ្យម​ទទួលបានផលចំនួនពី ៥ទៅ ៦តោន ខណៈកំពង់ធំបានទទួលអំណោយស្រូវពូជចំនួន១០០តោន។

ជាមួយគ្នាប្រជាពលរដ្ឋរស់នៅភូមិភូមិអូរគន្ធរត្បូង បានលើកឡើងថា ក្រោយពីទទួលបានស្រូវពូជ ដែលជាអំណោយដ៏ថ្លៃថ្លារបស់សម្តេចតេជោ ហ៊ុន សែន នាយករដ្ឋមន្ត្រី ពួកគាត់ចាប់ផ្តើមភ្ជួររាស់​សាបព្រោះ ដើម្បីបង្កបង្កើនផល និងស្តារជីវភាពឡើងវិញ ក្រោយពីទទួលរងផលប៉ះពាល់ដោយ​សារទឹកជំនន់ ៕