ឧត្តរមានជ័យ៖ នាព្រឹកថ្ងៃទី១ ខែកុម្ភៈ​ ឆ្នាំ២០២៣នេះ នៅស្នងការដ្ឋាននគរបាលខេត្តឧត្តរមានជ័យ មានបើកវគ្គបណ្តុះបណ្តាលស្តីពីជំនាញតួរនាទីភារកិច្ចរបស់ប៉ុស្តិ៍នគរបាលរដ្ឋបាលក្នុងការអនុវត្តគោលនយោបាយភូមិឃុំសង្កាត់មានសុវត្ថិភាពនិងការងារនគរបាលសហគមន៍។

វគ្គបណ្តុះបណ្តាលនេះធ្វើឡើងក្រោមវត្តមានរបស់លោកឧត្តមសេនីយ៍ទោ មាស លឹមតុង ប្រធាន​នាយកដ្ឋានកិច្ចការប៉ុស្តិ៍នគរបាល ព្រមទាំង​មានការ​ចូលរួម​ពី​អាជ្ញាធរតាម​បណ្តាលក្រុង​ស្រុក​សរុប១៣០នាក់។

បន្ទាប់ពីលោកឧត្តមសេនីយ៍ទោ ហួត សុធី ស្នងការដ្ឋាននគរបាលខេត្តឧត្តរមានជ័យ មានមតិ​ស្វាគមន៍​រួចមក លោកឧត្តមសេនីយ៍ទោ មាស គឹមតុង បានលើកឡើងថា ការបើកវគ្គបណ្តុះ​បណ្តាលជូនដល់មន្រ្តីនគរបាលរដ្ឋបាលប៉ុស្តិ៍ទាំងអស់នៅពេលនេះ គឺមានសារៈសំខាន់ខ្លាំងណាស់​សម្រាប់មន្រ្តីនគរបាលប៉ុស្តិ៍ទាំងអស់ ក្នុងការងារបម្រើសេវាផ្សេងៗ ជូនដល់ប្រជាពលរដ្ឋក្នុង​មូលដ្ឋាន​របស់ខ្លួនប្រកបដោយកម្លាភាព ប្រសិទ្ធភាពខ្ពស់ ដើម្បីបង្កើនសមត្ថិភាពគុណភាព​ការ​​ងារ​ដល់នគរបាលតាមបណ្តាលមូលដ្ឋានប៉ុស្តិ៍ទាំងអស់ ឲ្យមានប្រសិទ្ធភាពការងារខ្ពស់​ក្នុងការផ្តល់សេវា​ជូន​ប្រជាពលរដ្ឋ ប្រកបដោយក្រមសីលធម៌ភាពស្មោះត្រង់ជាមួយពលរដ្ឋ។

លោកឧត្តមសេនីយ៍ទោ បានបន្តថា ក្នុងវគ្គបណ្តុះបណ្តាលជំនាញ​កិច្ចការរដ្ឋបាលប៉ុស្តិ៍ជូនដល់​មន្រ្តី​នគរបាលប៉ុស្តិ៍នៅពេលនេះដែរ មន្រ្តីរដ្ឋបាលនគរបាលរដ្ឋបាលប៉ុស្តិ៍គ្រប់រូប​ត្រូវបន្តខិតខំ​រៀន​សូត្រ​ពង្រឹងសមត្ថិភាពរបស់ខ្លួនឲ្យកាន់តែមានសមត្ថិភាពខ្ពស់បន្ថែមទៀត ក្នុងការងាររដ្ឋបាលរបស់ខ្លួន​ដើម្បីបម្រើការងារក្នុងការផ្តល់សេវានានាជូនពលរដ្ឋក្នុងមូលដ្ឋានប្រកប​ដោយ​ប្រសិទ្ធភាពខ្ពស់ និង​មានការ​ជឿជាក់ពីប្រជាពលរដ្ឋក្នុងមូលដ្ឋានផងដែរ៕